रौतहट । रौतहटको मध्यभागमा रहेको गरुडा नगरपालिकामा एमालेका नगर प्रमुख कन्थमणी जयसबाल निर्वाचित भएयता लथालिङ्ग बन्दै गएको छ ।

पालिकालाई आफन्त र आसेपासेमार्फत एकलौटी, मनोमानी ढङ्गले चलाउन खोजेका जयसवालका कारण दिनहुँ जसो धर्ना ,बिरोधका कार्यक्रम हुँदा पालिकाका दैनिक काम भद्रगोल बन्दै गएको छ ।

शुक्रबार पालिकाकी उपप्रमुख पुनम चौधरीसहितका जनप्रतिनिधिले पालिकाको कार्यालयमै ताला लगाएर धर्नामा बसेपछि पालिकामा चरम असन्तुष्टि रहेको प्रष्ट बुझिन्छ । कार्यालयमा ताला लगाएर उपप्रमुखलगायत ९ जना जनप्रतिनिधि धर्नामा बसेका छन् ।

उपप्रमुख चौधरीलगायत ६ वडाका अध्यक्षसहित ३ जना कार्यपालिका सदस्य धर्नामा बसेका हुन् । विभिन्न ६ बुदे माग राख्दै पालिकाको मुख्य गेटमै तालाबन्दी गरि धर्नामा बसेका हुन् । पहिलो चरणको आन्दोलन स्वरुप उनीहरूले कार्यालयमा ताल्चा लगाइ कार्यालय अगाडि धर्नामा बसेका छन । कार्यालयमा लगाइएको ताल्चा खोल्न पुग्दा मेयर जयसवाल र आन्दोलनरत पक्ष बिच केहीबेर घम्साघम्सी समेत भएको थियो ।

मेयर र आन्दोलनरत जनप्रतिनिधि समर्थकबीच विवाद उत्पन्न हुँदा केही बेर गरुडाको अवस्था तनावग्रस्त भएको थियो ।

महिनौँदेखि तलब भत्ताबाट बञ्चित रहेका करारका कर्मचारीलाई बाँकी रहेको तलब दिनुपर्ने, कार्यपालिकाको नियमित बैठक बोलाउनु पर्ने, नगर सभाका निर्णयहरू कार्यपालिका बैठकमा सार्वजनिक गर्नुपर्ने, गत आर्थिक वर्ष र यस चालू आर्थिक वर्षको सम्पूर्ण खर्चहरू कार्यपालिका बैठकमा पेश गर्नुपर्ने, जथाभावी नियुक्त गरिएका करारका कर्मचारी खारेज गर्नुपर्ने र प्रत्येक वडामा समान बजेट बिनियोजन गर्नुपर्ने उनीहरूको माग छ ।

मेयर जयसवालले आफु सहित कार्यपालिकाको बहुमत सदस्यहरूलाई पेलेर एक्लौटी रूपमा हिड्‌न थालेपछी बाध्य भएर आफुहरुलाइ आन्दोलनमा उत्रिनु परेको उपमेयर पुनम देवी चौधरी बताउँछिन् । कर्मचारी र आफूहरूले पाउने विभिन्न सेवा सुविधा समेत मेयर जयसवालले कटौती गरेको उपमेयर चौधरीले गुनासो गरिन ।

आफूखुसी बजेट बिनियोजन गर्न खोजेको तथा एक्लौटी शासन गर्न खोजेको कारण आफूहरू आन्दोलित बनेको कार्यपालिका सदस्यहरू बताउँछन । यता गरुडाका मेयर जयसवालले आफ्ना निहित स्वार्थ पुरा नहुँदा उपमेयर चौधरी सहितका कार्यपालिका सदस्य आन्दोलनमा उत्रिएको प्रतिक्रिया दिए ।

धर्नामा बसेकाहरूले आआफ्ना वडामा एक,  एक करोड बजेट दिन माग गरेको र आफूले त्यति बजेट दिन नसकिने बताएपछि उनीहरू पालिकामा तालाबन्दी गरी जनतालाई दुख दिने नियतले आन्दोलन गरेको बताए ।