सर्लाहीमा युवकमाथि गोली प्रहार गरेको आरोप लागेका हवल्दार जिल्ला तानिए

सर्लाही : सर्लाहीको बरहथवा नगरपालिकामा आन्दोलनका क्रममा गोली चलाएको आरोपमा एक प्रहरी वरिष्ठ हवल्दार जिल्ला तानिएका छन् । 

Watch On

शुक्रबार नगरपालिकामा भएको विवादका क्रममा गोली चलाएर युवकको हत्या गरेको आरोप लागेका इलाका प्रहरी कार्यालय बरहथवामा कार्यरत प्रहरी वरिष्ठ हवल्दार सोनेलाल यादव जिल्ला प्रहरी कार्यालय सर्लाही तानिएका हुन् ।

प्रत्यक्षदर्शी तथा आन्दोलनकारीले उसैले गोली चलाएका कारण स्थानीय जयशंकर साहको मृत्यु भएको आरोप लगाएपछि उनीमाथि छानबिनका लागि जिल्ला तानिएको जिल्लाा प्रहरी कार्यालय सलार्हीले जनाएको छ । 

मृतक परिवार र आन्दोलनरत पक्षले वरिष्ठ हवल्दार यादवले रिसीबी साँध्न जयशंकरमाथि गोली प्रहार गरेको भन्दै तीन दिनदेखी घटनास्थलबाट सव उठाएका छैनन् । 

मृतकका परिवारले साहलाई शहीद घोषणा गर्नुपर्ने, मृतकको नामबाट प्राथमिक स्वास्थ्य केन्द्र बरहथवाको नामकरण र स्तरोन्नति गर्नुपर्ने, र बरहथवाका मेयरले राजीनामा दिनु पर्ने लगायतका माग राखेर आन्दोलनरत छन् ।

शुक्रबार बरहथवा ६ को प्राथमिक स्वास्थ्य केन्द्रको स्तरोन्नतिका विषयमा भएको प्रदर्शन नियन्त्रणमा लिने क्रममा प्रहरीले चलाएको गोली लागेर स्थानीय जयशंकरको मृत्यु भएको थियो । आन्दोलनमा सहभागीनै नभएको जयशंकरको मृत्यु भएपछि स्थानीयले राखेका माग पूरा नभएसम्म शव नउठाउने बताउँदै आएका छन् ।