आज रातिबाट विश्व फुटबलको महाकुम्भ, यी हुन् विश्वकप बारे बुझ्नै पर्ने कुरा !

काठमाडौँ । विश्व फुटबलको महाकुम्भ फिफा विश्वकप २०२६ आज मध्यरातिबाट सुरु हुँदैछ । बिहीबार नेपाली समयअनुसार राति १२ः४५ बजे मेक्सिको र दक्षिण अफ्रिकाबीचको खेलसँगै विश्वकप सुरु  हुनेछ ।

यसपटक सुरुबाट विश्वकपमा केही कीर्तिमानहरु बनिसकेका छन् । पहिलो पटक तीन देशहरु अमेरिका, मेक्सिको र क्यानाडामा हुने विश्वकपमा टोलीसंख्या ३२ बाट बढाएर ४८ पुर्याइएको छ । यसअघि ६४ खेल हुँदै आएकोमा यसपटक  १०४ खेल हुनेछन् । ३९ दिनको चल्ने रोमाञ्चक खेलहरु विभिन्न १६ शहरका १६ मैदानमा हुने छ । 

Watch On

जसमा अमेरिकाका ११, मेक्सिको ३ र क्यानडाका २ शहर समावेश छन् । जुलाई १९ मा न्युयोर्क– न्यु जर्सीस्थित मेटलाइफ रंगशालामा हुने फाइनल खेलसहित च्याम्पियन टोलीले कूल ८ खेल खेल्नेछ ।

पछिल्लोपटक अमेरिकाले सन् १९९४ मा विश्वकप आयोजना गरेको थियो । जतिबेला मात्र २४ टोली थिए । १५औं संस्करण त्यतिबेला ५२ खेल भएका थिए । यसपाली टोली र खेल संख्या दोब्बरले बढेको छ । मेक्सिको भने तेस्रो पटक विश्वकप आयोजना गर्ने पहिलो देश बन्नेछ । क्यानाडा भने पहिलो पटक घरेलु मैदानमा विश्वकप खेल्दैछ । 

आयोजक फिफाले प्रतियोगिता तीनै देशमा भव्यरुपमा उद्घाटन गर्दैछ । मेक्सिको सिटी, टोरन्टो र लस एन्जलसमा छुट्टाछुट्टै समारोह आयोजना गरिनेछ । तीनवटै आयोजक राष्ट्रले आफ्नो संस्कृति, इतिहास र पहिचानलाई विश्वसामू प्रस्तुत गर्ने फिफाले जनाएको छ । 

मेक्सिको सिटीमा हुने मुख्य उद्घाटन समारोहमा शाकिरा, बर्ना ब्वाय, जे बाल्भिन, टाइला लगायतका अन्तर्राष्ट्रिय कलाकारहरुले प्रस्तुति दिनेछन् । त्यसपछि ऐतिहासिक एस्टाडियो एज्टेकामा मेक्सिको र दक्षिण अफ्रिकाबीचको उद्घाटन खेल हुनेछ ।

यो विश्वकपमा पनि साविक विजेता अर्जेन्टिना, उपविजेता फ्रान्स, सन् २०१० को विजेता स्पेन, पोर्चगल, जर्मनी, नेदरल्यान्ड्स र सर्वाधिक ५ पटकको च्याम्पियन ब्राजिललाई उपाधि दाबेदारको रुपमा हेरिएको छ । 
पाँच पटकको विश्वकप च्याम्पियन ब्राजिल लगातार २३औं पटक विश्वकप खेल्न लागेको हो । तर, चार पटकको विश्व च्याम्पियन इटाली भने लगातार प्रतियोगितामा छनोट हुन असफल भयो । इटालीसँगै अफ्रिकन महारथीहरु क्यामरुन र नाइजेरिया पनि छनोट हुन सकेनन् । 

यस्तै, यसपटक स्कटल्यान्ड, नर्वे, मोरक्को, आइभोरी कोस्ट, इक्वेडर र सेनेगलजस्ता टोलीहरुलाई सम्भावित ‘डार्क हर्स’का रुपमा हेरिएको छ । एर्लिङ हालान्ड र मार्टिन ओडेगार्डको नेतृत्वमा रहेको नर्वे, स्कट म्याकटोमिने र जोन म्याकगिनको स्कटल्यान्ड तथा मोरक्कोले ठूला टोलीहरुलाई चुनौती दिन सक्ने क्षमता राख्छन् ।

त्यस्तै उज्वेकिस्तान, हाइटी, कुरासाओ र केप भर्डे पहिलो पटक विश्वकप खेल्दैछन् । उनीहरु पनि नयाँ कथा लेख्ने योजनामा छन् । 

यो विश्वकप पोर्चुगलका कप्तान क्रिष्टियानो रोनाल्डो, अर्जेन्टिनाका कप्तान लियोनल मेसी, क्रोएसियाका लुका मोड्रिक, जर्मनीका गोलकिपर म्यानुअल नेउर जस्ता खेलाडीको अन्तिम हुने अनुमान गरिएको छ । 

मेसी अर्जेन्टिनालाई लगातार दोस्रो विश्वकप उपाधि दिलाउने अभियानमा छन् । प्रतियोगिताका दौरान ३९ वर्ष पुग्ने मेसी सम्भवतः आफ्नो अन्तिम विश्वकप खेल्दैछन् । सन् १९६२ यता कुनै पनि राष्ट्रले लगातार दुई विश्वकप जित्न सकेको छैन । त्यसैले अर्जेन्टिनासामू इतिहास रच्ने अवसर पनि छ ।

४१ वर्षीय क्रिस्टियानो रोनाल्डो पनि अझै पोर्चुगलको टोलीमा छन् । युवा सहित मिश्रित टोली भएकाले पोर्चुगललाई यसपाली उपाधिको प्रमुख दाबेदारका रुपमा हेरिएको छ ।

यस्तै, युवा स्टार फ्रान्सका कप्तान किलियन एमबाप्पे अर्का प्रमुख आकर्षण हुन् । 
त्यस्तै इङ्ल्यान्डका ह्यारी केन करिअरकै उत्कृष्ट लयमा छन् । स्पेनका युवा स्टार लामिन यामाल, ब्राजिलका राफिन्हा, अनुभवी नेयमार प्रमुख आकर्षण हुनेछन् । एम्बाप्पे, रोनाल्डो, मेसी, केन, लामिन र राफिन्हालाई नै यसपटकको गोल्डेन बुट दाबेदारको रुपमा हेरिएको छ ।