अन्नपूर्ण आधार शिविरमा पर्यटकको चहलपहल बढ्यो, दैनिक दुई सयको हाराहारीमा पुग्दै

म्याग्दी । अनुकूल मौसम र दसैँ–तिहारको बिदाका कारण म्याग्दीको अन्नपूर्ण गाउँपालिका–४ नारच्याङस्थित अन्नपूर्ण आधार शिविर र मौरिस हर्जोग पदमार्गमा पर्यटकको चहलपहल बढेको छ ।

Watch On

आठ हजार ९१ मिटर अग्लो अन्नपूर्ण प्रथम हिमालको आधार शिविर, पञ्चकुण्ड ताल र मौरिस हर्जोग पदमार्गमा पछिल्लो समय आन्तरिक तथा बाह्य पर्यटकको आकर्षण बढेको हो ।

मौरिस हर्जोग पदमार्गका अभियन्ता तेज गुरुङका अनुसार दसैँपछि दैनिक दुई सय जनाको हाराहारीमा नेपाली, भारतीय र तेस्रो मुलुकका पर्यटक आधार शिविर पुगिरहेका छन् । गत असोजको मनसुनजन्य विपद्बाट पदमार्गमा क्षति नपुगेको र यात्रा सुरक्षित रहेकाले बिदा मनाउन युवायुवती तथा रोजगारीमा रहेका व्यक्तिहरूको रोजाइमा यो गन्तव्य परेको उनले बताए ।

उनका अनुसार पदमार्गका रेस्टुरेन्ट तथा क्याम्पहरू पर्यटकले भरिभराउ छन् । समुद्री सतहदेखि चार हजार ५० मिटरको उचाइमा रहेको आधार शिविर पछिल्लो समय नयाँ पर्यटकीय गन्तव्यका रूपमा विकास हुँदै गएको छ । पर्यटकको आगमन बढेपछि बेनी, भुरुङ–तातोपानी र नारच्याङका पर्यटन व्यवसायीसमेत उत्साहित भएका छन् ।

अन्नपूर्ण आधार शिविरको पारिवारिक भ्रमण सकेर बेनी फर्किएकी म्याग्दी बहुमुखी क्याम्पसकी प्राध्यापक मनिता रायमाझीले दुईदेखि तीन दिनमै पूरा गर्न सकिने यो यात्रा छोटो, साहसिक र रमणीय रहेको प्रतिक्रिया दिइन् ।

पर्यटकको सुविधाका लागि हुमखोलादेखि आधार शिविरसम्मका विभिन्न स्थानमा अस्थायी संरचना निर्माण गरी चिया तथा खाजा पसल र खाना तथा बसोबासको व्यवस्था मिलाइएको छ । सन्धीखर्क, भुस्केट मेला र पञ्चकुण्ड ताल परिसरमा आश्रयस्थलसमेत निर्माण गरिएको छ ।

त्यस्तै, हुमखोला, फुतफुते झरना, गुफाफाँट, भुस्केट र पञ्चकुण्ड क्षेत्रमा खानेपानी, शौचालयलगायत पर्यटकीय पूर्वाधार निर्माण गरिएका छन् । सङ्घ, प्रदेश र गाउँपालिकाको बजेटबाट पदमार्ग तथा झोलुङ्गे पुलको मर्मतसम्भार गरिएको छ ।

आधार शिविरमा पहिलो आरोही मौरिस हर्जोग, लुइस लचेनल र नेपाली सहयोगी सोनाम वाङ्चुक शेर्पाका सालिक राखिएका छन् । त्यहाँ खुला सङ्ग्रहालयसमेत स्थापना गरिएको छ । गत साता पदमार्गको प्रवेशद्वार बाँसबोटमा पर्यटक सूचना केन्द्र स्थापना गरिएको अन्नपूर्ण गाउँपालिका–४ का वडाध्यक्ष लोकबहादुर फगामीले जानकारी दिए ।

नेपालको ‘जेठो हिमाल’का रूपमा चिनिने अन्नपूर्ण प्रथमको आधार क्षेत्रसम्म पुग्ने यस पदमार्गको नाम पहिलो आरोही मौरिस हर्जोगको सम्मानमा राखिएको हो ।

नारच्याङको दोभान–छोटेपा हुँदै हुमखोलासम्म करिब २० किलोमिटर सवारीसाधनमा यात्रा गर्न सकिन्छ । हुमखोलाबाट थप करिब २१ किलोमिटर पैदल यात्रा गरी दुई दिनमा आधार शिविर पुग्न सकिन्छ । पदमार्गमा पर्ने फुतफुते झरना, पञ्चकुण्ड ताल र अन्नपूर्ण हिमालको मनोरम दृश्यले यो यात्रालाई थप आकर्षक बनाउने गरेको छ ।