भाषा, संस्कृति र सम्पदाको संरक्षण सबैको साझा दायित्व : मन्त्री श्रेष्ठ

काठमाडौं । ऊर्जा, जलस्रोत तथा सिँचाइमन्त्री विराजभक्त श्रेष्ठले भाषा, संस्कृति, संस्कार र सम्पदाको संरक्षण तथा प्रवर्द्धन गर्दै नयाँ पुस्तामा हस्तान्तरण गर्नु सबैको साझा दायित्व भएको बताएका छन् ।

Watch On

नेपाल संवत् ११४७ तथा तिहारलगायत चाडपर्वको अवसरमा शनिबार साँझ काठमाडौंको डल्लु आवास क्षेत्रमा आयोजित विशाल मैनबत्ती र्‍याली उद्घाटन गर्दै उनले यस्तो बताएका हुन् । स्वर्णिम युवा समूहको अगुवाइमा आयोजित र्‍यालीमा १२ वटा स्थानीय क्लब सहभागी थिए ।

नेपाल भाषा, नेवा संस्कृति र सम्पदा नेपालको मौलिक पहिचान र गौरव भएको उल्लेख गर्दै मन्त्री श्रेष्ठले यसको संरक्षण विगतको विरासत जोगाउने विषयमा मात्र सीमित नभई भावी पुस्ताको पहिचान र सांस्कृतिक भविष्य सुरक्षित गर्ने अभियानसमेत भएको बताए ।

उनले विगतका भाषिक आन्दोलन र सांस्कृतिक अभियानबाट प्राप्त उपलब्धिको रक्षा गर्दै नयाँ पुस्तालाई आफ्नो भाषा, संस्कृति, परम्परा र संस्कारप्रति जागरुक बनाउनुपर्नेमा जोड दिए ।

मौलिक पहिचानप्रति गर्व गर्ने र त्यसलाई व्यवहारमै जीवन्त राख्ने संस्कृतिको विकास गर्नुपर्ने उनको भनाइ थियो । यस्ता सामुदायिक तथा सांस्कृतिक अभियानले सामाजिक एकता, सांस्कृतिक सद्भाव, पुस्तान्तरण र सांस्कृतिक जागरणलाई थप बलियो बनाउने विश्वास पनि उनले व्यक्त गरे ।