तिहारले विपद्का बेला एकअर्कालाई साथ दिन प्रेरित गर्छ : सभामुख अर्याल

काठमाडौं । सभामुख डोलप्रसाद (डीपी) अर्यालले तिहार पर्वले आपसी सद्भाव, भाइचारा र सहकार्यको भावना विकास गर्दै विपद्का बेला एकअर्कालाई सहयोग गरेर अघि बढ्न प्रेरित गर्ने विश्वास व्यक्त गरेका छन् ।

Watch On

तिहार, २०८३ को अवसरमा शुभकामना सन्देश जारी गर्दै सभामुख अर्यालले स्वदेश तथा विदेशमा रहेका सम्पूर्ण नेपाली दाजुभाइ तथा दिदीबहिनीमा सुख, शान्ति, समृद्धि, दीर्घायु र निरन्तर प्रगतिको शुभकामना व्यक्त गरेका हुन् ।

उनले यस वर्ष भोटेकोशी बाढीलगायत प्राकृतिक विपद्का पीडाबीच चाडपर्व मनाउनुपरेको उल्लेख गर्दै यस्ता कठिन परिस्थितिमा तिहारले आपसी सहयोग र सद्भावको भावना थप बलियो बनाउने बताए ।

तिहारले मानव र प्राणी जगतबीचको सहसम्बन्धलाई आत्मसात् गर्नुका साथै दिदीबहिनी र दाजुभाइबीचको स्नेहलाई थप गाढा बनाउने उनको भनाइ छ ।

बहुजातीय, बहुभाषिक, बहुधार्मिक र बहुसांस्कृतिक विशेषतायुक्त नेपाली समाजमा तिहारले सामाजिक सद्भाव र अन्तरघुलनलाई बलियो बनाउँदै विविधताबीचको एकता कायम राख्न महत्त्वपूर्ण योगदान पुर्‍याउने सभामुख अर्यालले उल्लेख गरेका छन् ।

विविधताबीचको एकतालाई आत्मसात् गर्दै राष्ट्र निर्माणको मार्गमा अघि बढ्न संघीय संसद् दृढ र प्रतिबद्ध रहेको बताउँदै उनले तिहारले पारस्परिक सद्भाव, सहिष्णुता र मेलमिलापको भावना अभिवृद्धि गरी राष्ट्रिय एकतालाई थप सुदृढ बनाउने विश्वास व्यक्त गरेका छन् ।