प्रथम ऐतिहासिक महाधिवेशन : यस्तो छ रास्वपाको ८ वटा तयारी

काठमाडौँ । राष्ट्रिय स्वतन्त्र पार्टीले ७ देखि ९ असारसम्म चितवनमा हुने राष्ट्रिय महाधिवेशनका लागि विभिन्न तयारी गरिरहेको छ ।

महामन्त्री कबिन्द्र बुर्लाकोटीकाअनुसार अहिले तयारीका लागि मुख्यत ८ वटा कामहरु भइरहेको छ । पहिलो प्रतिनिधि छनोट अन्तिम चरणमा छ । 'प्रतिनिधि टुंगिने चरणमा छ,' महामन्त्री बुर्लाकोटीले भने । महाधिवेशनका लागि तीन हजार प्रतिनिधि आउने तयारी छ । 

Watch On

दोस्रो महाधिवेशन स्थल तय भएको छ । सुरुमा टाडीस्थित स्टार बेंक्वेट होटल र नजिकको चौरमा टेन्ट हालेर खुला सत्र र बन्द सत्र    गर्ने तय भएकोमा चितवनको अत्यधिक गर्मीलाई मध्यनजर गर्दै चितवन प्रदर्शनी केन्द्र तय गरिएको छ । 
तेस्रो आउनेहरुको बास र भोजनको व्यवस्थापनका लागि काम भइरहेको छ । 

चौथो प्रतिवेदनको काम भइरहेको छ । सभापति रबि लामिछानेको राजनीतिक प्रतिवेदनका साथै संगठन,  आर्थिक र अनुशासन समितिको मस्यौदा भइरहेको महामन्त्री बुर्लाकोटीले बताए । 

पाँचौ विधान संशोधनको काम भइरहेको छ । 'विधानको मस्यौदा रेडी । भोलि छलफल भएर टुंगिन्छ,' उनले भने ।   

छैठौँ निर्वाचनको कार्यालय स्थापनाको काम भइरहेको छ । विद्युतीय मतदानमा जाने कि मतपेटिका राख्ने, खर्च कस्तो हुन्छ भनेर निर्क्यौल गर्ने काम भइरहेको छ ।

सातौ महाधिवेशनका लागि आर्थिक व्यवस्थापनको काम भइरहेको छ । 'फण्ड रेजिङको काम भइरहेको छ । स्रोतहरु जुटिरहेको छ,' महामन्त्री बुर्लाकोटीले भने । 

आठौं उद्घाटन सत्रको तयारी भइरहेको छ । मञ्च व्यवस्थापन, सजावट, सांस्कृतिक कार्यक्रमको तयारी भइरहेको छ । उद्घाटन सत्रमा सम्बोधनका लागि अन्य दलका नेतालाई आमन्त्रण गरिसकिएको छ ।