कार्ड बाँड्न थालियो, मंगलबार बन्दसत्र

काठमाडौँ । राष्ट्रिय स्वतन्त्र पार्टी (रास्वपा) को प्रथम महाधिवेशनमा सहभागी प्रतिनिधिहरुलाई परिचयपत्र (कार्ड) बाँड्न सुरु भएको छ ।

सोमबार साँझ ७ बजेपछि महाधिवेशन प्रतिनिधिहरुलाई कार्ड बाँड्न थालिएको हो । प्रिन्ट भइसकेका कार्ड सोमबार रातिसम्म बाँडिने र बाँकी कार्ड रातभरमा छापेर मंगलबार बिहान बाँडिने निर्वाचन आयोगले जनाएको छ ।

Watch On

महाधिवेशन प्रतिनिधिहरुको नामावली टुंगो नलाग्दा प्रतिनिधिहरुले कार्ड पाएका थिएनन् भने कार्ड नहुँदा बन्दसत्र समेत हुन सकेको थिएन । सोहीकारण सोमबार बन्दसत्र भएन ।

मंगलबार बिहान ७ बजेदेखि पुनः कार्ड बाँडिने र त्यसपछि बन्दसत्र हुने प्रवक्ता मनिष झाले जानकारी दिए ।

रास्वपा महामन्त्री कविन्द्र बुर्लाकोटीले पनि मंगलबार बिहान  बिहान ७ बजेपछि बन्दसत्र सुरु हुने जानकारी दिए । उनका अनुसार, प्रतिनिधिहरु विरुद्धमा परेको उजुरीमाथिको छानबिनका लागि समय आवश्यक भएकाले बन्दसत्र सारिएको हो । बन्दसत्र उद्योग संघको प्रदर्शनी केन्द्रमा हुँदैछ ।

उनले बन्दसत्रको सुरुमा अनुशासन आयोगबाट रमाकान्त रिमालले अनुशासन आयोगको प्रतिवेदन प्रस्तुत गर्ने जानकारी दिए । त्यसपछि कोषाध्यक्ष लिमा अधिकारीको आर्थिक प्रतिवेदन प्रस्तुत हुने छ ।

कोषाध्यक्षको प्रतिवेदनपछि महामन्त्री कविन्द्र बुर्लाकोटीले संगठनात्मक प्रतिवेदन प्रस्तुत गर्नेछन् । महामन्त्रीको प्रतिवेदन पारित भएपछि पार्टीका सहमहामन्त्री विपीन आचार्यले विधान संशोधन प्रस्ताव पेश गर्नेछन् ।

विधान अनुमोदन भएपछि पार्टी सभापति रवि लामिछानेले राजनीतिक प्रतिवेदन पेस गर्नेछन् ।

सभापतिको राजनीतिक प्रतिवेदन पारित भएपछि पार्टी सभापति लामिछानेले अन्तरिम व्यवस्थापन समिति गठन घोषणा गर्दै सम्पूर्ण जिम्मेवारी निर्वाचन आयोगलाई दिने तालिका छ ।

बन्दसत्रबाट सबै प्रतिवेदन पारित भएपछि निर्वाचन प्रक्रिया सुरु हुने छ ।