रास्वपामा उम्मेदवार बन्न पैसा कति लाग्छ, अरु के के चाहिन्छ ?

काठमाडौँ । राष्ट्रिय स्वतन्त्र पार्टी (रास्वपा)को महाधिवेशन अन्तर्गत नयाँ नेतृत्व चयनका लागि आज उम्मेदवारी दर्ता हुँदैछ । केन्द्रीय निर्वाचन आयोगले सभापति, पदाधिकारी र केन्द्रीय सदस्यमा उम्मेदवारी दर्ताका लागि आवश्यक शुल्क, प्रस्तावक, समर्थक र कागजातको सूची सार्वजनिक गरेको छ ।

सभापतिको उम्मेदवार बन्न ५१ हजार रुपैयाँ शुल्क लाग्ने छ । त्यस्तै, एक जना प्रस्तावक र ५१ जना समर्थक चाहिने रास्वपा निर्वाचन आयोगले जनाएको छ ।

Watch On

रास्वपा निर्वाचन आयोगले उम्मेदवारी दर्ता, शुल्क तथा आवश्यक कागजातबारे सूचना जारी गर्दै सभापति पदमा उम्मेदवारी दिन ५१ हजार र ५१ जना समर्थक चाहिने जनाएको हो ।

रास्वपाले सभापतिमा रवि लामिछानेलाई नै सर्वसम्मत चयन गर्ने तयारी गरेको छ । सभापतिमा एक जनाको मात्रै उम्मेदवारी पर्ने सम्भावना छ ।

त्यसैगरी, पदाधिकारीका लागि ४१ हजार रुपैयाँ शुल्क तोकिएको छ भने प्रस्तावक एक जना र समर्थक २१ जना तथा केन्द्रीय सदस्यको उम्मेदवार बन्न २१ हजार शूल्क, १ जना प्रस्तावक र २१ जना समर्थक चाहिने पनि सूचनामा उल्लेख छ ।

उम्मेदवारी दर्ताका लागि विवरण भरिएको उम्मेदवारी मनोनयन पत्र फाराम, उम्मेदवारी शुल्क बुझाएको नगदी रसिद वा बैंक भौचर, अनुशासन कारबाहीमा नपरेको स्व–घोषणापत्र, पार्टी सदस्यता प्रमाणपत्रको प्रतिलिपि र पासपोर्ट साइजको फोटो २ प्रति चाहिने पनि केन्द्रीय निर्वाचन आयोगका प्रमुख भुवन के.सी.द्वारा हस्ताक्षरित सूचनामा उल्लेख छ ।

ख्याल गर्नुपर्ने कुरा के छ भने कुनै पनि पदको उम्मेदवार अर्को कुनै उम्मेदवारको प्रस्तावक वा समर्थक बस्न पाइने छैन । कोही कसैको प्रस्तावक वा समर्थक बसेमा उम्मेदवारी खारेज हुने निर्वाचन आयोगले जनाएको छ । 

पहिलो चरणमा सभापति र केन्द्रीय सदस्य चयन गरिने छ । एक जना सभापति र ९९ जना केन्द्रीय सदस्य चुनिनेछन् ।

दोस्रो चरणमा पदाधिकारी चयनका लागि निर्वाचन हुने छ । रास्वपाको पदाधिकारी सूचीमा एक वरिष्ठ नेता, तीन उपसभापति (एक महिलासहित), दुई महामन्त्री, ५ सहमहामन्त्री, एक कोषाध्यक्ष, २ सहकोषाध्यक्ष र एक प्रवक्ता छन् ।

पहिलो चरणको निर्वाचनको मतपरिणाम सार्वजनिक भएपछि दोस्रो चरणको निर्वाचन तालिका सार्वजनिक गरिने निर्वाचन आयोगले जनाएको छ ।

पहिलो चरणको निर्वाचन भोलि हुने छ ।