बन्दसत्रमा आज के के हुन्छ ?

काठमाडौँ । महाधिवेशन प्रतिनिधिको नाम टुंगो नलाग्दा हिजो हुन नसकेको बन्दसत्र रास्वपाले आज सञ्चालन गर्दैछ । दिउँसो २ बजे सभापति रवि लामिछानेले बन्दसत्र सुरु गर्नेछन् ।

दिउँसो २ बजदेखि साँझ पौने ७ बजेसम्म चल्ने महाधिवेशनमा ६ वटा प्रतिवेदन पेश हुने छन् । ती प्रतिवेदनमाथि छलफल हुनेछ र पारित गरेर बन्दसत्र समापन हुने छ ।

Watch On

बन्दसत्र सुरु भए लगत्तै २ बजेर १० मिनेटमा रमाकान्त रिमालले अनुशासन आयोगको प्रतिवेदन पेश गर्नेछन् । अनुशासन आयोगको प्रतिवेदन पेश गर्न, छलफल गर्न र पारित गर्न साढे दुई बजेसम्मको समय छुट्याइएको छ ।

त्यसपछि २ बजेर ३० मिनेटमा कोषाध्यक्ष लिमा अधिकारीले आर्थिक प्रतिवेदन पेश गर्नेछिन् । उनको प्रतिवेदनका लागि ३० मिनेटको समय छुट्याइएको छ ।

आर्थिक प्रतिवेदन पारित भइसकेपछि ३ बजे महामन्त्री कविन्द्र बुर्लाकोटीले संगठनात्मक प्रतिवेदन पेश गर्ने कार्यसूची छ । महामन्त्रीको प्रतिवेदन पेश र छलफलका लागि ४५ मिनेट तय गरिएको छ ।

महामन्त्रीको प्रतिवेदनपछि सहमहामन्त्री विपीन आचार्यले तीन बजेर ४५ मिनेटमा विधान संशोधन प्रस्ताव पेश गर्नेछन् । विधानका लागि १ घण्टाको समय राखिएको छ । ४ बजेर ४५ मिनेटमा विधान पारित गरिने छ ।

दिउँसो ४ः४५ देखि ५ः१५ बजेसम्म उपसभापति डा. स्वर्णिम वाग्लेले ‘राष्ट्रिय स्वतन्त्र पार्टीको अर्थ–राजनीतिक प्रस्तावना’पेश गर्नेछन् । वाग्लेको पेश गरेको प्रस्तावना पारित भएपछि सभापति रवि लामिछानेले ५ः१५ देखि ६ः३५ बजेसम्म राजनीतिक प्रस्ताव पेश गर्नेछन् ।

यी सबै प्रतिवेदन र प्रस्तावहरु पारित भइसकेपछि सभापति लामिछानेले साँझ पौने ७ बजे पार्टीको अन्तरिम व्यवस्थापन समिति घोषणा गर्नेछन् र सम्पूर्ण जिम्मेवारी निर्वाचन आयोगलाई प्रदान गर्नेछन् ।