सुरु भयो रास्वपा महाधिवेशनको बन्दसत्र

चितवन । राष्ट्रिय स्वतन्त्र पार्टी (रास्वपा)को पहिलो महाधिवेशन अन्तर्गत बन्दसत्र सुरु भएको छ । प्रतिनिधिको नाम टुंगो नलाग्दा हिजो हुन नसकेको बन्दसत्र आज केही बेरअघि सुरु भएको हो । दिउँसो २ बजे तोकिए पनि केही ढिला गरी बल्ल सुरु भएको हो ।

रास्वपा सभापति रवि लामिछानेले बन्दसत्र सुरु गरेका हुन् । प्रधानमन्त्री एवम् वरिष्ठ नेता बालेन शाह भने बन्दसत्रमा आइसकेका छैनन् ।

Watch On

साँझ ७ बजेसम्म चल्ने महाधिवेशनमा ६ वटा प्रतिवेदन पेश हुने छन् । ती प्रतिवेदनमाथि छलफल हुनेछ र पारित गरेर बन्दसत्र समापन हुने छ ।

बन्दसत्रको सुरुमै रमाकान्त रिमालले अनुशासन आयोगको प्रतिवेदन पेश गर्नेछन् । त्यसपछि कोषाध्यक्ष लिमा अधिकारीले आर्थिक प्रतिवेदन पेश गर्नेछिन् । उनको प्रतिवेदनका लागि ३० मिनेटको समय छुट्याइएको छ ।

आर्थिक प्रतिवेदन पारित भइसकेपछि महामन्त्री कविन्द्र बुर्लाकोटीले संगठनात्मक प्रतिवेदन पेश गर्ने कार्यसूची छ । महामन्त्रीको प्रतिवेदन पेश र छलफलका लागि ४५ मिनेट तय गरिएको छ ।

महामन्त्रीको प्रतिवेदनपछि सहमहामन्त्री विपीन आचार्यले विधान संशोधन प्रस्ताव पेश गर्नेछन् । विधानका लागि १ घण्टाको समय राखिएको छ । विधान पारित भएपछि उपसभापति डा. स्वर्णिम वाग्लेले ‘राष्ट्रिय स्वतन्त्र पार्टीको अर्थ–राजनीतिक प्रस्तावना’पेश गर्नेछन् । वाग्लेको पेश गरेको प्रस्तावना पारित भएपछि सभापति रवि लामिछानेले राजनीतिक प्रस्ताव पेश गर्नेछन् ।

यी सबै प्रतिवेदन र प्रस्तावहरु पारित भइसकेपछि सभापति लामिछानेले पार्टीको अन्तरिम व्यवस्थापन समिति घोषणा गर्नेछन् र सम्पूर्ण जिम्मेवारी निर्वाचन आयोगलाई प्रदान गर्नेछन् ।