नेयमार ९८१ दिनपछि मैदानमा, भिनिसियसको कीर्तिमान

काठमाडौं । ब्राजेलियन फुटबलमा सर्वाधिक गोलकर्ताको कीर्तिमान बनाएका नेयमार ९८१ दिनमा मैदान फर्किएका छन् । सन् २०२३ को नोभेम्बरमा ब्राजिलबाट अन्तिम खेल खेलेका नेयमार बिहीबार बिहान स्कटल्यान्डविरुद्धको खेलबाट मैदान फर्किएका हुन् । 

नेयमार कमब्याक गरेको समूह ‘सी’ को अन्तिम खेलमा ब्राजिलले स्कटल्यान्डविरुद्ध ३–० को जित निकाल्यो । म्याथ्युस कुन्हाको स्थानमा ७६औं मिनेटमा मैदान प्रवेश गरेका नेयमारले गोल भने गरेनन् । अमेरिकाको हार्डरक मैदानमा ब्राजिलको जितमा भिनिसियस जुनियरले दुई तथा कुन्हाले नै एक गोल थपेका थिए । 

Watch On

बार्सिलोना हुँदै पेरिस सेन्ट जर्मेन (पिएसजी) पुगेका नेयमारले निरन्तर घाइते भइरहे । त्यसपछि उनी साउदी क्लब अल हिलाल हुँदै बचपनको क्लब सान्तोषमा पुगेका छन् । तर, लगातार घाइते हुँदा विगत दुई वर्षदेखि अन्तर्राष्ट्रिय फुटबलबाट टाढा रहेका थिए । 

ब्राजिलको टिम हेरिरहेका इटालियन प्रशिक्षक कार्लाे एन्सोलोटीले नेयमारको अनुभव काम लाग्ने बताउँदै टिममा समावेश गरेका हुन् । पहिलो खेलमा मोरक्को र दोस्रो खेलमा हाइटीविरुद्ध नेयमार मैदानमा उत्रन सकेनन् । अन्ततः एन्सोलोटीले ९८१ दिनपछि नेयमारलाई कमब्याक गराएका छन् । 

यता, स्कटल्यान्डविरुद्धको जितमा युवा स्टार भिनिसियसले कीर्तिमान कायम गरेका छन् । उनी पछिल्लो पुस्तामा लगातार विश्वकपको तीन खेलमा गोल गर्ने पाचौं खेलाडी बने । यसअघि सन् १९७० मा जर्जिन्हो, १९९४ मा रोमारियो, २००२ मा रिभाल्डो र रोनाल्डोले यो कीर्तिमान बनाएका थिए । 

भिनिसियसले यो विश्वकपमा मोरक्को, हाइटी र स्कटल्यान्डविरुद्ध नै गोल गरेका छन् । हाइटी र मोरक्कोविरुद्ध समान एक गोल गरेका उनले तीन खेलमा चार गोल गर्न सफल हुँदै गोल्डेन बुटको दाबेदारी दिएका छन् । 

समूहमा लगातार दोस्रो जितपछि ब्राजिल विजेता बन्दै अन्तिम ३२ मा स्थान बनाएको छ । समान ७ अंक भएपनि ब्राजिलले मोरक्कोलाई तीन गोलले पछि पार्याे । स्कटल्यान्डको तीन अंक रहँदा तेस्रो भएर नकआउट पुग्ने सम्भावना अझै बाँकी छ । त्यसकोलागि अन्य टोलीको खेल पर्खनु पर्छ । लगातार तीन खेलमा पराजित भएको हाइटी भने समूह चरणबाट  माथि बढ्न सकेन ।