संस्थापक उपसभापति अर्याललाई निर्वाचित केन्द्रीय समितिको धन्यवाद

काठमाडौँ । राष्ट्रिय स्वतन्त्र पार्टी (रास्वपा) केन्द्रीय समितिको बैठक बस्दा सभापति रवि लामिछानेसँगै हुन्थे– उपसभापति डोलप्रसाद (डीपी) अर्याल । रविको अनुपस्थितिमा त डीपीले नै बैठकको अध्यक्षता गर्थे । कार्यबाहक सभापतिका रुपमा समेत डीपीले पार्टीको नेतृत्व गरे ।

तर, गएको चैत २० यता डीपी रास्वपामा सक्रिय छैनन् । सभामुख चुनिएसँगै उनी दलीय राजनीतिमा सक्रिय छैनन् । आफैं संस्थापक भएर बनाएको पार्टीको पहिलो महाधिवेशनमा समेत उनको सहभागिता रहेन ।

Watch On

महाधिवेशनमा सहभागी रास्वपाका कैयौं नेता तथा कार्यकर्ताले डीपीलाई सम्झिए । महाधिवेशनका सहभागीहरुले संस्थापक उपसभापति अर्याललाई सम्झिए, महाधिवेशनबाट निर्वाचित केन्द्रीय समितिले पहिलो बैठकमै डीपीलाई सम्झियो ।

डीपी अर्याललाई ‘मिस’ गरिरहेको महाधिवेशन

पहिलो महाधिवेशनबाट निर्वाचित पदाधिकारी र सदस्यहरुले बुधबार पार्टी केन्द्रीय कार्यालय घण्टीघरमा शपथ लिए । शपथ लगत्तै निर्वाचित केन्द्रीय समितिको बैठक बस्यो ।

पहिलो बैठकमै सभापति लामिछानेले संस्थापक उपसभापति (वर्तमान सभामुख) डीपी अर्याललाई सम्झिए र धन्यवाद ज्ञापनको प्रस्ताव राखे ।

‘हाम्रो पार्टीको स्थापनादेखि संगठन विस्तारसम्म र समग्र आन्दोलन तथा अभियानमा संस्थापक उपसभापति डीपी अर्यालको महत्वपूर्ण योगदान छ’ बैठकमा सभापति लामिछानेले भने, ‘हामीले पहिलो बैठकबाट नै उहाँको योगदानको उच्च कदर गर्दै उहाँप्रति धन्यवाद ज्ञापन गरौं।’

सभापति लामिछानेको यो प्रस्तावलाई केन्द्रीय समितिले सर्वसम्मत पारित गर्यो ।

संवैधानिक व्यवस्थाका कारण पहिलो महाधिवेशनमा सहभागी हुन नपाएका डीपी अर्याललाई निर्वाचित केन्द्रीय समितिले पहिलो बैठकमै सम्झियो र उनीप्रति धन्यवाद ज्ञापन गर्यो । रास्वपाका नेताहरुले भनेका छन्– ‘पार्टीमा योगदान पुर्याएकाहरुलाई पार्टीले यसैगरी सम्झिनुपर्छ, जुन अभ्यास सुरु भएको छ ।’