एमाले अध्यक्ष ओली र सल्लाहकार सदस्य सुरेन्द्र मानन्धरबीच भनाभन

काठमाडौँ । पार्टी पुनगर्ठनबारे केन्द्रीय सल्लाहकार परिषद्सँगको छलफलमा एमाले अध्यक्ष केपी शर्मा ओली र सदस्य सुरेन्द्र मानन्धरबीच नोकझोक भएको छ । 

छलफलमा सहभागी एक नेताकाअनुसार मंगलबार एमाले पुनर्गठन कार्यदलले केन्द्रीय सल्लाहकार परिषद्का सदस्यहरुसँग पार्टी पुनर्गठनबारे छलफल गरिरहेको थियो । बैठक सञ्चालन प्रचार विभाग प्रमुख निरज आचार्यले गरेका थिए । बैठक चलिरहँदा अध्यक्ष ओली आइपुगेका थिए । ओली आइपुग्दा सुरेन्द्र मानन्धर बोलिरहेका थिए । जसै अध्यक्ष आइपुगे निरज आचार्यले उनलाई आसनग्रहण गराए । आसनमा बस्न नपाउँदै ओली बोल्न थालिहाले ।

Watch On

आफ्नो कुरा नसकिँदै ओली बोल्न थालेपछि मानन्धर क्रुद्ध भए । 'हामी कुनै हालतमा सुध्रँदैनौ, हामीलाई सुध्रनु छैन भन्ने कुराको प्रमाण हो यो,' उनले भनाइ उद्धृत गर्दै ती सदस्यले भने, 'हामी पार्टी बनाउने कुरा गरिराखेका छौं । तर नेतृत्वलाई आफ्नै कुरा सुनाउन हतार छ । यसले पार्टी बन्दैन भन्ने कुराको संकेत गर्छ ।' 

मानन्धरले ओली बोलेकाप्रति असन्तुष्टि राखेपछि अध्यक्षले पार्टी अनुशासनको पाठ पढाउन थालेको बैठकमा सहभागी अर्का नेताले बताए । उनकाअनुसार ओलीले पार्टीको स्थापित विधि मूल्य मान्यता हुने भन्दै यसको परिपालना नै पार्टी अनुशासन भएको बताएका थिए । 

त्यसपछि सल्लाहकार सदस्य उषाकिरण तिम्सेनाले मानन्धरले भनेको कुरा सही भएको बताउँदै नेतृत्वले तलका सुझावहरु सुन्नुपर्ने बताएकी थिइन् । त्यसपछि ओली उनीतर्फ पनि खनिएका थिए । उनलाई 'चुप लाग नानी' भनेको बैठकमा सहभागी ती नेताको दाबी छ । 

बैठकको वातावरण असहज बनेपछि केन्द्रीय सदस्य एवं प्रचार विभाग प्रमुख निरज आचार्यले सहजीकरण गर्न खोजेका थिए । उनले 'सुरेन्द्र कमरेड त बोलिसक्नुभयो त' भनेर अर्का सदस्यलाई बोल्न दिन खोजेपछि मानन्धरले प्रतिवाद गरेका थिए । 'हामी १३ वर्षदेखि केन्द्रीय कमिटीमा छौं । पार्टी पद्धति, विधि हामीलाई थाहा छ । मैले आफ्ना कुरा टुंग्याएको छैन । पार्टी आन्दोलनका बारेमा गम्भीर समीक्षा गर्नुपर्नेछ । नेतृत्वमा सुन्ने धैर्य हुनुपर्छ,' मानन्धरले भनेका थिए । 

मानन्धरले यति भने पनि ओली बोल्न रोकिएनन् । उनले करिब २५ मिनेट बोलेका थिए । बोल्ने क्रममा उनले पार्टी पुनर्गठन भन्दा पुनर्जागरण र एकताबद्ध बनाउनुपर्नेमा जोड दिएका थिए । 

पार्टी पुनर्गठन सुझाव कार्यदलले मंगलबार केन्द्रीय कार्यालय च्यासलमा केन्द्रीय सल्लाहकार परिषद्सँग छलफल गरेको थियो । एमालेमा १०औ केन्द्रीय महाधिवेशनबाट निर्वाचित केन्द्रीय सदस्य भएका तर ११औ महाधिवेशनमा चुनाव जित्न नसकेकाहरु स्वत: सल्लाहकार सदस्य हुने व्यवस्था छ । 

छलफल ओली आउनुअघि नै बोलेका सल्लाहकार सदस्य सोम मिश्रले समानुपातिक प्रणालीबाट एउटै व्यक्तिलाई बारम्बार अवसर दिने गरिएको भन्दै आपत्ति जनाएका थिए । 

उनले 'रामबहादुर थापा बादल र गुरु बरालजस्तालाई हो समानुपातिक प्रणाली, हाम्रा यस्तै शैलीले जनता हामीसँग रुष्ट छन्' भन्ने धारणा राखेका थिए । उनले पार्टी पुनर्गठन पुनर्जागरणको  पहिलो शर्त भएको पनि बताएका थिए ।

केन्द्रीय सल्लाहकार सदस्य उषाकिरण तिम्सेनाले पार्टी नेतृत्वप्रति (ओली) सम्पूर्ण बालिग रुष्ट रहेको र उनीहरुले प्रश्न गरिराखेको बताउँदै पार्टीले त्यसको सम्बोधन गर्नुपर्ने बताएकी थिइन् । 
'आजको समाजको सम्पूर्ण तह र तप्काका नागरिकहरु सम्पूर्ण बालिग मानिसहरुले अध्यक्ष ओलीलाई प्रश्न गरिराखेका छन् । यो कुरा हामीले सुन्ने कि नसुन्ने ? सुन्ने हो भने पुनर्गठन गर्ने कि नगर्ने ?' उनको भनाइ उद्धृत गर्दै एक नेताले बताए । 

तिम्सेनाले पार्टी यो अवस्थामा आइपुग्नुको भागिदार सबै हुनुपर्ने र सबैभन्दा बढी जिम्मेवारी नेतृत्वको हिसाबले ओलीले लिनुपर्ने बताएकी थिइन् । पार्टीमा अवसरको केन्द्रीकरण गरिएको, कुनै जिम्मेवारी प्राप्त गर्ने योग्यता क्षमता हुँदा हुँदै पनि 'बा'लाई भेट्नै पर्ने, खुसी बनाउनैपर्ने जस्ता संस्कृति निर्माण गरेर पार्टी अद्योगतितर्फ लगिएको बताएकी थिइन् ।   

त्यस्तै धारणा राख्ने अरु सदस्यहरुले नेतृत्वले षडयन्त्र भयो, हामीमाथि घेराबन्दी भयो, सामाजिक सत्ता अल्गोरिदमले कब्जा गर्यो भन्दै दोष अरुतिर देखाउने गरेको भन्दै आफूमाथि निर्मम समीक्षा गर्न भनेका थिए । 'आज हामीले अरुतिर दोष देखाइरहेका छौं । समाज अल्गोरिदमले कब्जा गरेको हो भने हामी किन चुक्यौ ? आखिर सत्ता त हामीसँगै थियो । त्यसकारण यो अरुलाई दोष देखाउने कुरा होइन । आफ्नो कमीकमजोरी स्वीकार्ने र आन्दोलनलाई पुनर्गठन गर्ने कुरा हो,' धारणा राख्ने क्रममा सदस्यहरुले भनेका थिए । 

पुनर्गठन कार्यदलले तहगत कमिटीहरुसँगको छलफल सकेको छ । अब बिहीबार बस्ने कार्यदलको बैठकले यी सुझावहरुलाई एकीकृत गरेर प्रतिवेदन तयार पार्नेछ । र सचिवालयमा पेस गर्नेछ । अब बस्ने केन्द्रीय कमिटी बैठकले प्रतिवेदनमा छलफल गरेर पुनर्गठनको योजना तयार पार्ने कार्यदलका सदस्यहरु बताउँछन् ।