प्रिय बचेरा तिमीहरूलाई नयाँ संसारमा स्वागत छ ! (तस्बिरकथा)

सहरी परिवेश । फाट्टफुट्ट देखिने रूखहरू । हरियाली पर्यावरण । बाहिर झमझम झरी परिरहेको छ ।

भर्खरै परेको पानीका थोपा उसका प्वाँखमा अडिएका छन् । अब उसले छाड्नु पर्नेछ जीर्ण हुँदै गरेको गुँड । छाड्नु पर्ने छ, आफूसँगै हुर्केका चिरविर गर्दै काका गर्न सिकेका बचेराहरू । 
छाड्नुपर्ने छ, एकाबिहानै वा समसाँझै चारो टिपेर ल्याउने आमाको चुच्चो । छाड्नु पर्नेछ घामपानीबाट ओताउने आमाका प्रिय पखेटाहरू । 

Watch On

यो कथा हो, भर्खरै गुँडमा हुर्किएका कागका बचेराहरूको । 

नेपालको तराईदेखि हिमालसम्म विभिन्न रङ, बान्की, शील स्वभावका कागहरू पाइन्छन् । 

पहाडी तथा मध्यपहाडी क्षेत्रमा भेटिने कागकाे रङ निख्खर कालो हुन्छ । का‍SS गदै आवाज निकाल्छन्, तिनको आवाजले शुभ या अशुभ संकेत गर्छ भन्ने मान्यता छँदै छ । 

सहरी क्षेत्रका कागहरूको रङमा थोरै भिन्नता देखिन्छ । 

सहरी क्षेत्रमा भेटिने प्रायः कागहरू केही प्रजातिका हुन्छन् । 

तीव्र सहरीकरणका कारण कागलाई बासस्थान खोज्न, गुँड बनाउन, बचेरा कोरल्न निकै सकस परेको छ । 

प्रायः कागहरूले अग्ला अग्ला रूखहरूमा झिँजाहरू बटुलेर गुँड बनाउँछन् । र त्यहीँ बचेरा कोरल्छन् ।

सहरको फैलावट, पूर्वाधारको विस्तारसँगै सहरका ठूला रूखहरू मासिँदै गएका छन् । 

रूखहरू नहुँदा चराहरूको बासस्थान पनि लोप हुँदै गएको छ । 

काठमाडौँको सघन सहरी बस्तीबाट केही पर नयाँ नैकाप क्षेत्रमा कागले अण्डा पार्नेदेखि बच्चा कोरल्नेसम्मको नयाँ जीवनचक्रलाई हामीले लेन्समा उतारेका छौँ ।

प्रस्तुत तस्बिर नेपाल फोटो लाइब्रेरीका लागि प्रकाशचन्द्र तिमिल्सिनाले कैद गरेका हुन् । 

यस दृश्यकथामा कागले अण्डा पार्नेदेखि बचेराले प्वाँख हालेर उड्न परिपक्क हुँदासम्मको करिब दुइ महिनाको जीवन चक्रलाई समाविष्ट गरिएको छ । 

साधारणतया, कागले अण्डा पार्नदेखि बच्चा कोरल्नसम्म ५० देखि ६० दिन समय लगाउँछ । 

गृष्मऋतु कागको प्रजननयाम हो । यही याममा कागका बचेराहरूले नयाँ संसार देख्छन् । 

प्रायः काग प्रजातिमा अण्डा पारेपछि भाले र पोथी आलोपालो गरेर ओथारा बस्छन् ।

उनीहरूले १८ देखि २५ दिनको बीचमा बचेरा कोरल्छन । करिब ५ देखि ७ हप्ताको अवधिमा कागका बचेरा गुँडबाट बाहिरि संसारमा पँखेटा फिँजाउन थाल्छन् ।