गणेशको मृत्यु प्रकरण छानबिन गर्न डीआईजीको नेतृत्वमा छानबिन समिति

काठमाडौँ । सरकारले गणेश नेपाली आत्मदाह घटनाको छानबिन गर्न छानविन समिति गठन गरेको छ ।

शुक्रबार प्रतिनिधिसभा बैठकमा आत्मदाह घटनाका बारेमा जानकारी गराउदै गृहमन्त्री सुधन गुरुङले उक्त घटनाको छानविनका लागि डीआईजी गोविन्द थपलियाको नेतृत्वमा ५ सदस्यीय छानबिन समिति बनाइएको जानकारी दिएका हुन् ।

Watch On

उनले उक्त घटनाको छानबिन तथा सोधपुछका लागि तीन जना महानगर प्रहरीलाई नियन्त्रणमा लिइएको बताए । बोल्ने क्रममा निकै भावुक हुनुभएका गृहमन्त्री गुरुङले नेपालीको जीवनरक्षाका लागि सरकार गम्भीर भएर नै उपचारका लागि भारत लैजाने प्रयास गरेको उल्लेख गरेका थिए ।

तर चिकित्सकको सल्लाह अनुसार भारत लैजाने अवस्था नदेखिएपछि बीर अस्पतालमा नै चिकित्सकहरुले उपचारको सक्दो प्रयास गरेको उनले बताए ।

आत्मदाह घटनाप्रति बिपक्षी सांसदहरुले गरेको टिप्पणी प्रति गृहमन्त्री गुरुङले आफूलाई स्टन्ट गर्ने इच्छा नभएको भन्दै देशको सेवा गर्न आफु पछि नहट्ने उल्लेख गरे । उनले उक्त घटना संघीय सरकारको कारण नभइ स्थानीय सरकारको नियम पालना गराउने क्रममा घटेको बताए ।

घटनालाई लिएर वर्तमान सरकारलाइ आरोप लगाएको भन्दै उनले नेपालीले आत्मदाह गरेको घटना घटेको स्थानीय तहमा कुन दलको सरकार छ ? भन्दै प्रश्न गरे । त्यस्तै गृहमन्त्री गुरुङले देश बनाउनका लागि सत्तापक्ष र प्रतिपक्षी नभनी सवै एकै ठाउमा उभिनुपर्ने धारणा व्यक्त गरेका थिए ।