सभापति लामिछानेलाई भेटेर के भने प्रधानमन्त्री शाहले ?

काठमाडौँ । प्रधानमन्त्री बालेन्द्र शाहले राष्ट्रिय स्वतन्त्र पार्टीका सभापति रबि लामिछानेसँग भेट गरेका छन । बुढानिलकण्ठस्थित सभापति लामिछानेको निवासमा भएको भेटमा प्रधानमन्त्री शाहले सरकारका पछिल्ला कामकारवाहीबारे जानकारी गराएका थिए । खासगरी पछिल्ला दिनमा समस्याको रुपमा देखा परेको सुकुम्बासी व्यवस्थापनका लागि सरकारले गरेको गृहकार्यको शाहले ब्रिफिङ गरेका थिए । 

सभापति लामिछाने र प्रधानमन्त्री बालेनको यो नियमित भेट हो । चितवनबाट फर्किएपछि नियमित फोन संवाद हुने गरे पनि भेट भएका थिएन । 

Watch On

सभापति लामिछानेको सचिवालयकाअनुसार प्रधानमन्त्री शाहले सुकुम्बासी ३८८ परिवारलाई तत्काल सुरक्षित व्यवस्थापन गर्न गृहकार्य भइरहेको र केही समयभित्र जग्गा उपलब्ध गराउने गरी काम अघि बढेका जानकारी गराए ।

'हाम्रो मन्त्रीहरु रातदिन लागिरहनुभएको छ । एकातिर सुरक्षित कसरी भनेर राख्ने भनेर तयारी भैरहेको छ भने अर्कोतिर जग्गा पनि तुरुन्तै उपलब्ध गराउनेगरी काम भइरहेको छ । अब सुकुम्बासी समस्या चाँडै समाधान हुन्छ । सरकार गम्भीरतका साथनै लागेको छ । केही दिनमै यो परिणाममै देखिनेछ । सभापतिज्यू ढुक्क भए हुन्छ,' प्रधानमन्त्री शाहले भनेका थिए । 

प्रधानमन्त्री शाहले सार्वजनिक सरोकारमा आएका विषयमा पनि सरकार गम्भीर भई तत्कालै आवश्यक कदम चाल्दै काम गरिरहेको पनि जानकारी गराएका थिए ।
सभापति लामिछानेले विकसित घटनाक्रमलाई विश्लेषण गरेर देश र जनताको हितमा संयमित भएर अगाडि बढ्न सुझाव दिएका थिए ।

शनिबारको भेटमा सरकारका नियमित काम तथा सरोकारका विषयमा कुरा भएपनि पार्टीको पदाधिकारी तथा केन्द्रिय सदस्य मनोनयका बारेमा भने विषयनै नउठेको जनाइएको छ ।