शंकर पोखरेल फकाउँदै केपी ओली, हाताहाती खोज्दैछन् पोखरेल

काठमाडौँ । नेकपा एमालेभित्र पार्टी पुनर्गठनको मुद्दा पेचिलो बनिरहँदा र कार्यदलले प्रतिवेदन लेख्न थाल्दा अध्यक्ष केपी शर्मा ओलीले महासचिव शंकर पोखरेललाई फकाउन थालेका छन् ।

एमाले पुनर्गठन कार्यदलले प्रतिवेदन तयार पार्ने जिम्मा संयोजक रामबहादुर थापा 'बादल' र महासचिव पोखरेललाई दिएको छ । गत असार २५ गते बसेको बैठकले प्रतिवेदन तयार पार्ने जिम्मा उनीहरूलाई दिएको थियो ।

Watch On

एक सदस्यले बताएअनुसार प्रदेश, विभाग, निकायका ७० प्रतिशतभन्दा बढी पदाधिकारी एवं सदस्यहरूले पुनर्गठनको पक्षमा धारणा राखेका छन् । कार्यदलले ८ वटै प्रदेशस्तरीय कमिटी, केन्द्रीय विभाग, निकायबाट छुट्टाछुट्टै सुझाव सङ्कलन गरेको थियो ।

तलबाट आएको सुझावलाई विश्लेषण गर्दा पार्टी पुनर्गठनको पक्षमा जबरजस्ती माहोल तयार भएपछि ओलीको कुर्सी हल्लिएको छ ।

गत मंसिरमा ११ औँ महाधिवेशन गरेर तेस्रो पटक अध्यक्ष भएका ओली विशेष महाधिवेशनबाट हट्नुपर्ने अवस्था सिर्जना हुन लागेकाले सशङ्कित बनेको उनी निकट एक नेताले बताए ।

‘कार्यदलले तलबाट आएका सुझावका आधारमा पुनर्गठनमै जानुपर्ने गरी प्रतिवेदन बनाउनुपर्ने हुन्छ, ७० प्रतिशतभन्दा बढी नेता-कार्यकर्ताले ओलीको विकल्प खोजेपछि अध्यक्ष सशङ्कित हुनु स्वभाविकै हो,’ ती नेताले भने ।

कार्यदलले प्रतिवेदन बनाउने काम थाल्नुअघि अध्यक्ष ओलीले महासचिव पोखरेललाई बोलाएर पार्टीभित्र थप ध्रुवीकरण ननिम्त्याउन आग्रह गरेको ती नेताको भनाइ छ ।

गत फागुन २१ को प्रतिनिधिसभा निर्वाचनमा एमाले २५ सिटमा खुम्चिएपछि ओली हटाउने सन्दर्भमा उपाध्यक्ष विष्णु पौडेल र महासचिव शंकर पोखरेल एक ठाउँमा उभिएका थिए । उनीहरूले तत्काल विशेष महाधिवेशनमा जाने गरी छलफल थालेका थिए ।

त्यसका लागि सचिवालय बैठकबाटै आफ्नो पक्षमा माहोल सिर्जना गर्ने, बहुमत केन्द्रीय सदस्य पुनर्गठनको पक्षमा खुल्ने अवस्था बनाएर विधानको धारा ७३ को व्यवस्था अनुसार विशेष महाधिवेशन आह्वान गर्ने समझदारी जुटाएका थिए ।

पौडेल र पोखरेलले नेतृत्वमा अध्यक्ष ओलीलाई राखेर कुनै हालतमा आन्दोलन उठाउन नसकिने भन्दै तलतल कार्यकर्ता ध्रुवीकृत पनि गरेका थिए ।

सम्पत्ति शुद्धीकरण कसुरमा पौडेल पक्राउ परेपछि पुनर्गठनको मुद्दा ओझेलमा परेको छ ।

पुनर्गठनका पक्षमा खुलेका नेताहरू केही रक्षात्मक बनेका छन् । यही मौका पारेर ओली थप सक्रिय बनेका छन् । उनले असन्तुष्ट केन्द्रीय सदस्य, सल्लाहकार सदस्यहरूलाई भक्तपुरस्थित गुण्डु निवासमा बोलाएर ‘कन्भिन्स’ गराउन लागेका छन् ।

‘दृढ मनोबलका साथमा काममा खटिनुहोस्, जिम्मेवारी पाउनु भएको छैन भने पनि नेतृत्वले तपाईंका लागि ठाउँ सोचेको छ । अहिले पुनर्गठनभन्दा पनि स्थानीय तहको चुनावको तयारी हो, त्यही अनुसार तल परिचालित हुनुस्,’ ओलीको भनाइ उद्धृत गर्दै केही दिनअघि गुण्डु पुगेर फर्किएका एक नेताले भने ।

उनका अनुसार अध्यक्ष ओलीले सातै प्रदेशका केन्द्रीय सदस्यहरूलाई बोलाएर एक्लाएक्लै छलफल गरिरहेका छन् । त्यो छलफलको उद्देश्य पुनर्गठनको आवाज कमजोर बनाउने हो ।

शङ्कर पोखरेल माग्दै छन् हाताहाती

पुनर्गठन पक्षका एक नेताले बताएअनुसार उपाध्यक्ष पौडेल र महासचिव पोखरेल पद बाँडफाँडको अन्तिम टुङ्गोमा पुगिसकेका छैनन् ।

विशेष महाधिवेशनबाट ओली हटाउने नै उनीहरूको मुख्य ध्येय देखिन्छ । यद्यपि विशेष महाधिवेशनबाट पौडेल अध्यक्ष बन्ने, त्यसपछिको नियमित महाधिवेशनबाट पोखरेल अध्यक्ष बन्ने ‘जेन्टलमेन्ट एग्रिमेन्ट’ भएको नेताहरूको दाबी छ ।

घटनाक्रमले पनि त्यसको पुष्टि गरेको छ । त्यसैले पोखरेलले ओलीसँग अध्यक्षको सुनिश्चितता चाहेका छन् ।

तर, ओली त्यसका लागि तयार भइसकेका छैनन् । ‘अध्यक्ष ओलीलाई नेतृत्वमा यथावत राखेर तल जान सक्ने अवस्था छैन । त्यसो हुँदा ओलीलाई नेतृत्वबाट हटाएर नयाँ विकल्पमा जानुपर्ने हुन्छ । ओली नेतृत्व छाड्न तयार छैनन् । त्यसकारण महासचिव पोखरेल अध्यक्षबाट आश्वस्त हुने अवस्था छैन,’ पोखरेल निकट एक नेताले भने ।

पोखरेल सशङ्कित हुने अर्को पनि कारण छ । पछिल्लो समय ओली र पूर्वराष्ट्रपति विद्यादेवी भण्डारीबीच निकटता देखिएको छ । ओलीले भण्डारीलाई पो अघि सार्ने हुन् कि भन्ने भय पोखरेललाई छ ।

त्यो भयलाई सचिवालयको आठौँ बैठकले बलियो बनाएको थियो । आठौँ बैठकमा अध्यक्ष ओलीले पोखरेलसँग सल्लाह नै नगरी विद्या भण्डारीको सदस्यता फुकुवा गरिदिएका थिए ।

सचिवालय तहका एक नेताले भनेअनुसार बैठकमा अध्यक्ष ओलीले भण्डारीले सदस्यता पाऊँ भनी पठाएको निवेदन वाचन गरेर सदस्यता दिनुपर्ने तर्क गरेका थिए । ती नेताका अनुसार ओलीलाई भेषराज अधिकारीमार्फत भण्डारीले निवेदन पठाएकी थिइन् । ओलीले त्यही वाचन गरेका हुन् । त्यसपछि पोखरेल थप सशङ्कित बनेका हुन् ।

ओलीपछि भण्डारीले पार्टी नेतृत्वमा दाबी गर्छिन् र आफू पाखा लाग्नुपर्छ भनेर पोखरेलले त्यतिबेला भण्डारीको सदस्यता रोक्न जोडबल गरेका थिए । ओलीले साथ पनि दिए । तर ओलीले पोखरेल लगायत संस्थापन पक्षका नेताहरूलाई समेत थाहै नदिई सदस्यता फुकाइदिए ।

पछिल्लो समय ओली र भण्डारी बाक्लो संवादमा छन् । केही दिनअघि ओली र भण्डारीबीच संवाद भएको थियो ।

उनीहरूबीच पार्टीभित्र देखिएको सङ्कट, आफ्नै समूहले नेतृत्वमा खोजिरहेको विकल्पबारे पनि छलफल भएको थियो ।

त्यसकारण पनि महाधिवेशनताका ओलीलाई नेतृत्वमा निरन्तरता दिनुहुँदैन भन्ने भण्डारी पक्षका केही नेता अहिले तटस्थ छन् ।

कार्यदलले अहिले प्रतिवेदन लेख्न थालेको छ । प्रचार विभाग प्रमुख निरज आचार्यका अनुसार, कार्यदलले प्रतिवेदन बुझाएपछि पहिले सचिवालयमा छलफल हुने छ । सचिवालयमा छलफल भएपछि प्रतिवेदनलाई केन्द्रीय कमिटीमा लगिने छ।