खाली गर्न अटेरी गरेपछि नेपाल निजामति कर्मचारी संगठनको कार्यालयमा सरकारले लगायो ताला

काठमाडौँ । जिल्ला प्रशासन कार्यालयले नेपाल निजामति कर्मचारी संगठनको कार्यालयमा ताला लगाएको छ । कर्मचारी संगठनको कार्यालय रहेको उक्त भवन संरचना नेपाल सरकारको नाममा रहने गरी ताला लगाइएको जिप्रका काठमाडौँले जनाएको छ । 

भूमि व्यवस्था, सहकारी तथा सङ्घीय मामिला तथा सामान्य प्रशासन मन्त्रालयले असार २२ गते सरकारी जग्गामा निर्माण गरी प्रयोग हुँदै आएका निजामती कर्मचारी ट्रेड युनियन तथा संगठनका भवन र संरचना ३ दिनभित्र खाली गर्न निर्देशन दिएको थियो । 

Watch On

मन्त्रालयका अनुसार नेपाल सरकारले निजामती कर्मचारीको ट्रेड युनियन सम्बन्धी व्यवस्था खारेज गरेपछि साविकमा राष्ट्रियस्तरका ट्रेड युनियनका रूपमा रहेका केही संगठनहरूले सरकारी स्वामित्वको जग्गा प्रयोग गरी निर्माण गरेका भवन तथा अन्य संरचनाको कानुनी आधार समाप्त भएको हो । यससँगै मन्त्रिपरिषद्को निर्णय तथा श्रम तथा व्यावसायजन्य सुरक्षा विभागबाट सम्बन्धित ट्रेड युनियनहरूको दर्ता खारेज भइसकेको छ ।

मन्त्रालयले जारी गरेको सूचनामा सम्बन्धित संगठनहरूले सूचना प्रकाशित भएको मितिले तीन दिनभित्र भवन तथा अन्य संरचना पूर्ण रूपमा खाली गरी काजगात, सम्पत्तिको जिम्मेवारी र भवनको साँचो मन्त्रालयको आन्तरिक व्यवस्थापन  महाशाखामा बुझाउन भनेको थियो । तोकिएको समयभित्र संरचना खाली नगरिए प्रचलित कानुनबमोजिम आवश्यक प्रक्रिया अघि बढाइने चेतावनी पनि मन्त्रालयले दिएको थियो । 

सूचनामा स्वतन्त्र राष्ट्रसेवक कर्मचारी संगठन, नेपाल मधेशी निजामती कर्मचारी मञ्च, नेपाल निजामती कर्मचारी संगठन, नेपाल निजामती कर्मचारी युनियन, नेपाल राष्ट्रिय निजामती कर्मचारी संगठन, एकीकृत सरकारी कर्मचारी संगठन नेपाल, नेपाल स्वास्थ्यकर्मी संघ तथा मधेशी स्वास्थ्यकर्मी फोरम नेपाल लगायतका संगठनले प्रयोग गरिरहेका संरचना खाली गर्नुपर्ने उल्लेख गरिएको थियो । 

तर मन्त्रालयको पत्रलाई अटेरी गर्दै नेपाल निजामति कर्मचारी संगठनले भवन खाली नगरेपछि प्रशासनले ताला लगाएको हो । मन्त्रालयको सूचना अनुसार भवन खाली नगरेकोले ताला लगाइएको काठमाडौँ प्रशासनले जनाएको छ ।