एक झर पानीमै किन डुब्यो सुकुम्बासी राखिएको होल्डिङ सेन्टर ? विज्ञको रिसर्चमा भेटियो नयाँ तथ्य

काठमाडौँ । गत शनिबार काठमाडौँका नदी किनारबाट उठाएर लगिएका सुकुम्बासीहरु राखिएको सुन्दरीघाट स्थित अस्थायी सेल्टर पानीले चुर्लुम्म डुब्यो । राधा स्वामी सत्संगले भोगचलन गर्दै आएको सुन्दरीघाटको जमिन बागमती नदीकै बहाव क्षेत्र हो ।

केही वर्षअघि नदीले बहाव पश्चिमतिर सोझ्याउँदा त्यहाँ नदीउकास क्षेत्र बनेको थियो । त्यही खाली जमिनमा सत्संगले टहरा बनाएर भोगचलन गरिरहेको छ ।

Watch On

काठमाडौँका अव्यवस्थित बसोबासी एवं सुकुम्बासीहरुलाई उनीहरुको वर्गीकरण नहुन्जेल अस्थायी प्रबन्ध भन्दै त्यहाँ राखिएको थियो । तर सामान्य पानी पर्ने वित्तिकै राति बाढी आएर डुबानमा पर्‍यो । अहिले त्यहाँका बसोबासीहरुलाई खरिपाटी लगेर व्यवस्थापन गरिएको छ ।

अब प्रश्न उठ्छ, सामान्य पानी पर्दा नै सुन्दरीघाटको सेल्टरसम्म बागमती नदीको बहाव कसरी आइपुग्यो । यही प्रश्नको उत्तर खोज्न जलस्रोत सम्बन्धी जानकार हरि पण्डित सुन्दरीघाट पुगेका रहेछन् ।

आफू कुनै विज्ञ भन्दा पनि इन्जिनियरिङ क्षेत्रको विद्यार्थी भएकाले त्यहाँ पुगेको उनले बताए । उनकाअनुसार सुन्दरीघाटमा रहेको सत्संग ठूलो बाढी आएर डुबेको थिएन । चोभारतर्फ जाने पुलको तल्लो भागमा खोलाको सतह उचालिनेगरी बनाएको संरचनाले बहाव राधास्वामी सत्संगतिर सोझ्याउन मद्दत गरेको आफ्नो अध्ययनले देखाएको उनले बताए ।

'यता नदीको प्राकृतिक चौडाइ घटाएर साँघुरो पारियो । उता नदीको प्राकृतिक बहाव उचालेर नदी बाहिर पानी आउन प्रेरित गरियो । यस्तो इन्जिनियरिङ अरु कुनै देशमा पनि होला कि हाम्रोमा मात्रै ?' उनले प्रश्न गरेका छन् । पानीले प्राकृतिक रुपमा बग्नका लागि भिरालो जमिन खोज्ने भएकाले यसलाई नबिथोल्नेगरी संरचना बनाउन उनले सुझाएका छन् ।