भानु देउवा, राजेश बज्राचार्य र गंगा दाहालमाथि अख्तियारको अनुसन्धान

काठमाडौँ । अख्तियार दुरुपयोग अनुसन्धान आयोगले पूर्वप्रधानमन्त्रीहरूको सचिवालयमाथि छानबिन थालेको छ । 

पूर्वप्रधानमन्त्रीहरू शेरबहादुर देउवा, केपी शर्मा ओली र पुष्पकमल दाहाल प्रचण्डको सचिवालयमाथि अनुसन्धान भैरहेको अख्तियार उच्च स्रोतले जनाएको छ । 

Watch On

स्रोतका अनुसार देउवाका स्वकीय सचिव भानु देउवा, ओलीका स्वकीय सचिव राजेश बज्राचार्य र प्रचण्डका स्वकीय समेत रहेकी छोरी गंगा दाहालमाथि अनुसन्धान भइरहेको छ । 

प्रारम्भिक अनुसन्धानमा उनीहरूले सरकारी नियुक्ति लिएको बाहेक थप अन्य आयको स्रोत नदेखिएको तर सम्पत्ति भने शंकास्पद देखिएको अख्तियार स्रोतको भनाइ छ । 

'वैधानिक आयस्रोतको तुलनामा सम्पत्ति अकुत  देखिन्छ, आफन्त तथा नजिकका व्यक्तिहरुको नाममा समेत सम्पत्ति लुकाएको आशंकामा अहिले विवरण मगाएर अनुसन्धान भइरहेको छ',स्रोतले भन्यो । 

अख्तियार उच्च स्रोतका अनुसार उनीहरूमाथि अकुत सम्पत्ति आर्जनमा अनुसन्धान भइरहेको छ । 

नेपाली कांग्रेसका सभापति देउवाको सचिवालय लामो समयदेखि भानु देउवाले सम्हालिरहेका छन् ।

देउवा पटक पटक प्रधानमन्त्री हुँदा पनि स्वकिय सचिवको भूमिकामा उनै भानु रहने गरेका छन् । 

यस्तै केपी ओली तीन पटक प्रधानमन्त्री हुँदा राजेश बज्राचार्य स्वकीय सचिव थिए भने अहिले पनि बज्राचार्यले नै ओलीको सचिवालय सम्हालिरहेका छन् । 

यस्तै प्रचण्डकी कान्छी छोरी समेत रहेकी गंगा दाहालले प्रचण्डका छोरा प्रकाश दाहालको निधनपछि सचिवालय सम्हाल्दै आएकी छिन् ।