ओली र प्रचण्डबीच मिल्यो भागबण्डा–कोशी, बागमती र लुम्बिनी एमालेलाई,  कर्णाली र सुदुरपश्चिम नेकपालाई

काठमाडौँ । प्रदेशमा सरकार बनाउने विषयमा नेकपा एमाले र नेपाली कम्युनिस्ट पार्टीबीच सहमति भएको छ । शनिबार दुई पार्टीबीच प्रदेशको नेतृत्व गर्ने विषयमा सहमति जुटेको हो । दुई पार्टीबीच प्रदेश सरकारको नेतृत्व गर्ने विषयमा ३ बुँदे लिखित सहमति भएको छ

सहमति पत्रमा एमालेबाट केपी शर्मा ओली र पुष्पकमल दाहाल प्रचण्डले हस्ताक्षर गरेका छन् । 

Watch On

‘पछिल्लो समय प्रदेश सभामा बजेट निर्माणमा देखिएका असमझदारी, बजेट विहीनताको अवस्था र अस्वस्थ राजनीतिक प्रतिस्पर्धा लगायतका समस्याहरूलाई समाधान गर्दै जनताको चाहना अनुरूप राजनीतिक स्थिरता, सुशासन, समृद्धि र प्रादेशिक विकासको गतिलाई तीव्र तुल्याउन हामी दुई राजनीतिक दलहरू नेपाल कम्युनिस्ट पार्टी (एमाले) र नेपाली कम्युनिस्ट पार्टी निम्नानुसारको सहमतिमा पुगेका छौं,’ सहमति पत्रमा भनिएको छ । 

उक्त सहमतिअनुसार कोशी, बागमती र लुम्बिनी प्रदेशको नेतृत्व नेपाल कम्युनिस्ट पार्टी (एमाले) ले गर्ने र कर्णाली प्रदेश र सुदूरपश्चिम प्रदेशको नेतृत्व नेपाली कम्युनिस्ट पार्टी (नेकपा)ले गर्ने उल्लेख छ । 

मधेस र गण्डकी प्रदेशमा सरकार गठनका सन्दर्भमा प्रदेश सभामा प्रतिनिधित्व गर्ने अन्य राजनीतिक दलहरूसँग समेत परामर्श गरी सरकारको नेतृत्व र सहभागिताको स्वरूप तय गर्ने उल्लेख छ । 

सहमति पत्रमा हस्ताक्षर गर्दा एमाले उपाध्यक्ष विष्णु पौडेल र नेपाली कम्युनिस्ट पार्टीका नेता वर्षमान पुन पनि सँगै देखिएका छन् ।