सुनसरीमा दुई पक्षबीच झडप: प्रहरीको गोली लागेर एक जनाको मृत्यु भएपछि स्थिति तनावग्रस्त, अनिश्चितकालिन कर्फ्यू जारी

काठमाडौँ । सुनसरीका केही स्थानमा कर्फ्यू र निषेधाज्ञा जारी गरिएको छ । 

दुई समूहबीचको विवाद र झडपका कारण सुनसरीको कप्तानगन्ज तनावग्रस्त बनेपछि जिल्ला प्रशासन कार्यालयले विहान ७ बजेदेखि लागु हुनेगरी हरिनगरा, भुटाहा, कप्तानगंज, घुस्की, देवानगंज बजार क्षेत्रमा अनिश्चितकालिन कफ्यू आदेश जारी गरेको हो । यी क्षेत्रमा कुनै पनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने गरी अनिश्चितकालिन कर्फ्यू आदेश जारी गरिएको हो । 

Watch On

यसैगरी जिल्ला प्रशासन कार्यालयले नै हरिनगर र देवानगंज गाउँपालिकाको सम्पूर्ण क्षेत्रमा विहान ७ बजेदेखि बेलुका ७ बजेसम्म निषेधाज्ञा जारी गरेको छ । यी क्षेत्रमा ५ जनाभन्दा बढी मानिस भेला हुन पाउने छैन । 

दुई समूहबीचको विवाद उग्र बनेपछि आइतबार रातिदेखि अवस्था नियन्त्रणबाहिर गएको छ । स्थिति नियन्त्रणमा लिने क्रममा प्रहरीले चलाएको गोली लागेर एक जनाको मृत्यु भएको छ । ८ जना घाइते भएका छन् । गोली लागेर घाइते भएकामध्ये देवानगञ्ज गाउँपालिका–३, कप्तानगञ्जका २४ वर्षीय ओमप्रकाश मेहताको उपचारका लागि जिल्ला अस्पताल इनरुवा पुर्याउनसाथ मृत्यु भएको जिल्ला प्रहरी कार्यालय सुनसरीका इन्स्पेक्टर प्रकाश पराजुलीले बताए । 

उनकाअनुसार बोलबम यात्राका लागि एउटा समूह डिजे बजाउँदै राति हिँडिरहेको र अर्को समूहले रातिको समयमा होहल्ला भएको भन्दै विरोध गरेपछि विवाद सुरु भएको थियो । विवाद झडपमा परिणत भएपछि प्रहरीले सुरुमा लाठीचार्ज, अश्रुग्यास र हवाई प्रहार गरेको थियो भने पछि गोली नै चलाउनुपर्ने अवस्था बनेको थियो । 

घटनामा नेपाल प्रहरीका इन्स्पेक्टर राकेश राईसहित ८ जना घाइते भएका छन् । इलाका प्रहरी कार्यालय देवानगन्जमा कार्यरत राईको टाउकोमा पाँच टाँका लगाइएको छ । अन्य सुरक्षाकर्मीको पनि उपचार भइरहेको छ । 

दुई समूहबीचको विवाद बढेर आगजनी र तोडफोड हुँदा कप्तानगन्ज एरिया तीन घण्टादेखि पूर्णरुपमा तनावग्रस्त बनेको प्रहरी निरीक्षक पराजुलीले बताए । सुरक्षाकर्मीमाथि समेत ढुंगामुढा र आक्रमण भएको थियो । त्यस क्रममा सुरक्षाकर्मी घाइते भएका हुन् । गोली लागेकाबाहेक झडपमा परेर घाइते हुने स्थानीय पनि धेरै छन् । 

विवाद उग्र बनेर दुई पक्षबीच सुरु भएको झडप र आक्रमणले हिंसात्मक रुप लिन थालेपछि स्थानीयको घर र पसलहरुमा समेत तोडफोड भएको प्रहरीले जनाएको छ । सवारीसाधनमा समेत आगजनी गरिएको छ । घटनास्थलमा ठूलो संख्यामा नेपाल र सशस्त्र प्रहरी परिचालन गरिएको छ । ठूलो संख्यामा रहेका सुरक्षाकर्मीले स्थिति नियन्त्रणमा लिने प्रयास गरिरहेका छन् । 

जिल्लाभरका सुरक्षाकर्मीलाई कप्तानगन्ज केन्द्रित गरिएको छ । थप मद्दतका लागि विभिन्न स्थानबाट सुरक्षाकर्मी लैजाने क्रम जारी छ ।