सुनसरीमा कर्फ्यू कायमै, घटनास्थल पुग्दै गृहको छानबिन टोली

काठमाडौँ । दुई पक्षको झडपले उग्र रुप लिँदा हिंसात्मक बनेको सुनसरीमा सोमबारदेखि लागेको कर्फ्यू कायमै छ ।

जिल्ला प्रशासन कार्यालयले सोमबार विहानदेखि अनिश्चितकालीन कर्फ्यू लगाएको छ । मंगलबार पनि कर्फ्यू जारी रहेको कार्यालयले जनाएको छ ।

Watch On

प्रशासन कार्यालयले सोमबार बेलुका अद्यावधिक सूचना जारी गर्दै राति ९ बजेदेखि अर्को सूचना नभएसम्मका लागि पूर्वमा इनरुवा नगरपालिका ३ र ६ नम्बरको सीमा (महेन्द्र राजमार्गअन्तर्गतको घोपाली टोल), पश्चिममा कोशी ब्यारेजको पुल र उत्तर दक्षिणतिर महेन्द्र राजमार्गदेखि २०० मिटर क्षेत्रसम्म कर्फ्यू आदेश जारी गरिएको छ । यो क्षेत्रमा कसैले आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने गरी अनिश्चितकालीन कर्फ्यू जारी गरिएको सूचनामा उल्लेख छ । 

आइतबार राति सुनसरीको कप्तानगन्जमा दुई पक्षबीचको झडप हिंसात्मक घटनामा परिणत भएको थियो । स्थितिलाई नियन्त्रणमा लिन प्रहरीले गोली चलाउँदा एक जनाको मृत्यु भएको छ भने केही घाइते भएका छन् । यसपछि पनि स्थिति नियन्त्रणमा नआएपछि स्थानीय प्रशासनले अनिश्चितकालीन कर्फ्यू आदेश जारी गरेको हो । कर्फ्यू जारी भएपछि सुनसरीमा सेना परिचालन समेत गरिएको छ ।  

छानबिन टोली घटनास्थल पुग्दै

घटनाको छानबिन गर्न गठित छानबिन समिति आज घटनास्थल पुग्दैछ ।

समितिका पदाधिकारी सोमबार राति नै सुनसरी पुगिसकेका छन् ।

उनीहरुले घाइतेसँग अस्पतालमै पुगेर घटनाबारे जानकारी लिएका छन् । 

घटनालगत्तै गृहमन्त्री सुधन गुरुङले मन्त्रालयका सहसचिव भुपेन्द्र थापाको संयोजकत्वमा पाँच सदस्यीय छानबिन समिति गठन गरेका थिए । समितिलाई सात दिनभित्र प्रतिवेदन बुझाउनेगरी कार्यादेश दिइएको छ । 

साथै मन्त्री गुरुङले कोशी प्रदेशका डिआईजी र सुनसरीका सिडिओ र एसपीलाई समेत जिम्मेवारीबाट हटाएर नयाँलाई पठाएका छन् ।