सेना परिचालनपछि नियन्त्रणमा आयो देवानगञ्जको अवस्था, बजार क्षेत्र सामान्य बन्दै

सुनसरी । सुनसरीको देवानगञ्ज गाउँपालिका–४ स्थित बजार क्षेत्रको अवस्था नियन्त्रणमा आएको छ । दुई पक्षबीच भएको झडपपछि तनावग्रस्त बनेको क्षेत्रमा नेपाली सेनाको भगवतीदल गणको टोली परिचालन गरिएपछि सुरक्षा अवस्था सामान्य बन्दै गएको छ ।

मंगलबार साँझ करिब ७ः३० बजेदेखि सुरु भएको झडपका क्रममा बजार क्षेत्रमा तोडफोड तथा आगजनीका घटना भएका थिए । घटनापछि बजार क्षेत्र केही समय तनावग्रस्त बनेको थियो भने स्थानीयवासी त्रसित भएका थिए ।

Watch On

नेपाली सेनाका अनुसार भगवतीदल गणको टोली घटनास्थलमा पुगेर बजार क्षेत्रको सुरक्षा जिम्मेवारी सम्हालेपछि अवस्था नियन्त्रणमा आएको छ। हाल बजार क्षेत्रमा नेपाली सेना,  सुरक्षा निगरानी जारी रहेको छ।

घटनाको प्रारम्भिक चरणमा सुरक्षा निकायको उपस्थिति  नभएको भन्दै स्थानीयले गुनासो गरेका थिए । त्यसपछि नेपाली सेना  परिचालन गरिएसँगै बजार क्षेत्रको अवस्था क्रमशः सामान्य बन्दै गएको हो ।

त्यसैगरी, सुरक्षा अवस्थालाई थप प्रभावकारी बनाउन इटहरीदेखि कोशी ब्यारेजसम्मको पूर्व–पश्चिम राजमार्गमा नेपाली सेनाका बख्तरबन्द सवारीसाधनमार्फत नियमित गस्ती (पेट्रोलिङ) सञ्चालन गरिएको सेनाले जनाएको छ । 

उक्त राजमार्गको सुरक्षा अवस्था सामान्य रहेको तथा सर्वसाधारणको आवागमनलाई सुरक्षित बनाउन सुरक्षा सतर्कता कायम राखिएको सेनाको भनाइ छ ।