कुलमान घिसिङविरुद्धका उजुरीमा छानबिन गर्न ऊर्जामन्त्री श्रेष्ठले बनाए समिति

काठमाडौँ । ऊर्जा, जलस्रोत तथा सिँञ्चाइमन्त्री विराज भक्त श्रेष्ठले ट्रान्सफर्मर र विद्युत मिटर खरिद तथा विद्युतका तार भूमिगत गर्ने परियोजनाका सम्बन्धमा प्राप्त उजुरीमा छानबिन अगाडि बढाएका छन् । 

मन्त्री श्रेष्ठको अध्यक्षतामा बुधबार बसेको नेपाल प्राधिकरण सञ्चालक समितिको बैठकले विगतका खरिद प्रक्रिया र सञ्चालनमा रहेका परियोजनासम्बन्धी उजुरी तथा गुनासोको अध्ययन गर्न  छानबिन समिति गठन गरेको छ । 

Watch On

सञ्चालक समितिका सदस्य शम्भु केसीको संयोजकत्वमा प्राविधिक, कानुनी तथा सार्वजनिक खरिदसम्बन्धी तीन जना विज्ञ सदस्य रहनेछन् भने प्राधिकरणले तोकेको उपकार्यकारी निर्देशक सदस्य सचिव रहनेछन् ।

छानबिन समितिलाई विगतका खरिद प्रक्रिया, सञ्चालन परियोजना तथा प्राप्त उजुरीको अध्ययन गरी सुधारका सुझावसहित दुई महिनाभित्र प्रतिवेदन बुझाउने जिम्मेवारी दिइएको छ ।

प्राधिकरणका सञ्चालक समिति सदस्य अंशुकिरण शाहीका अनुसार ट्रान्सफर्मर र विद्युत मिटर खरिदका विषयमा पछिल्लो २ महिनामा ६६८ वटा उजुरी परेको छ । एसियाली विकास बैंकको सहयोगमा अघि बढेको विद्युतका तार भूमिगत गर्ने काम र ट्रान्सफर्मरको विषयमा धेरै उजुरी छ । शाहीले प्राप्त उजुरीहरुको अध्ययन समितिले गर्ने बताए । 

प्राधिकरणकाअनुसार धेरै उजुरीहरु विद्युत प्राधिकरणका पूर्व कार्यकारी निर्देशक कुलमान घिसिङसँग सम्बन्धित छन् । घिसिङ सुशीला कार्की सरकारमा ऊर्जामन्त्री पनि भएका थिए ।