सुनसरी र सिरहापछि धनुषामा पनि कर्फ्यु

काठमाडौँ । जिल्ला प्रशासन कार्यालय धनुषाले जिल्लाका केही संवेदनशील क्षेत्रमा अनिश्चितकालीन कर्फ्यु आदेश जारी गरेको छ ।

प्रमुख जिल्ला अधिकारी प्रेमप्रसाद लुइँटेलद्वारा जारी आदेशअनुसार आज बसेको जिल्ला सुरक्षा समितिको बैठकको निर्णयका आधारमा आज साउन १४ गते दिउँसो ३ः३० बजेदेखि अर्को आदेश जारी नभएसम्म लागू हुने गरी कर्फ्यु लगाइएको हो ।

Watch On

आदेशमा स्थानीय प्रशासन ऐन, २०२८ को दफा ६ बमोजिम तोकिएका क्षेत्रमा कसैले आवतजावत गर्न, भेला हुन, जुलुस, प्रदर्शन, सभा तथा धर्ना गर्न नपाउने उल्लेख गरिएको छ । प्रशासनले आदेशको उल्लङ्घन गरे प्रचलित कानुनबमोजिम कारबाही गरिने चेतावनीसमेत दिएको छ ।

कर्फ्यु लागू गरिएको क्षेत्र चारकिल्ला तोकेर निर्धारण गरिएको छ । उत्तरतर्फ लक्ष्मीनियाँ हाटबजार चोकदेखि पश्चिम सिउरजोडा चोक हुँदै पूर्वमा लक्ष्मीपुर नोव्वासम्म, पूर्वतर्फ बेलौनी रोडस्थित एमयु स्टिलबाट ५०० मिटर पूर्व पेट्रोलपम्प हुँदै राष्ट्रिय प्राथमिक विद्यालयसम्म, दक्षिणतर्फ नगराइन नगरपालिका क्षेत्रदेखि नगराइन चोकसम्म तथा पश्चिमतर्फ सिउरजोडा–सोहनी–मनिमण्डप–नेपाल नर्सरी–इस्कोन–जनकपुर–ढल्केबर पुल–बेला–कादरी मस्जिदसम्मको क्षेत्र समेटिएको प्रशासनले जनाएको छ ।

गत आइतबार राति सुनसरीको देवानगञ्ज–३ कप्तानगञ्जमा दुई पक्षको झडपछि सुनसरी प्रशासनले सो क्षेत्रमा निरन्तर कर्फ्यु लगाइरहेको छ भने सिरहा प्रशासनले आज दिउँसो २ बजेदेखि गोलबजारका ३ वटा वडामा कर्फ्यु लगाएको छ । 

जिल्ला प्रशासन कार्यालयले सर्वसाधारणलाई कर्फ्यु आदेशको पूर्ण पालना गर्न आग्रह गरेको छ । संवेदनशील अवस्था र शान्ति–सुरक्षालाई ध्यानमा राख्दै उक्त निर्णय गरिएको प्रशासनको भनाइ छ ।