सुनसरी घटनापछि उत्पन्न अवस्थाप्रति पूर्वराजा चिन्तित, सद्भाव कायम गर्न अपिल

काठमाडौँ । पूर्वराजा ज्ञानेन्द्र शाहले सुनसरी जिल्लाका विभिन्न गाउँ बस्तीमा भएको आपसी द्वन्द्व भएको चिन्ता व्यक्त गरेका छन् । सुनसरीमा भएको विवादले जनधनको क्षति पुर्‍याएको र त्यसको असर कोशी क्षेत्र तथा तराईका विभिन्न भू–भागमा फैलिएको खबरले आफूलाई अत्यन्त दु:खी तुल्याएको उल्लेख गर्दै शाहले नेपालीहरूबीचको ऐतिहासिक एकता र सामाजिक सद्भाव कायम राख्न अपील गरेका छन् । 

संवाद सचिवालयमार्फत जारी सन्देशमा भनिएको छ, ‘समाजका सबै समुदायमा सामन्जस्य रहेको देशका रूपमा सुपरिचित नेपालमा यस प्रकारका अवाञ्छित घटना र दुर्घटना घट्नु चिन्ताको विषय हो । यो हाम्रो मौलिक मूल्य र मान्यता विपरीतको विषय हो ।’

Watch On

नेपालको गौरव र पहिचान नै बहुजातीय, बहुभाषिक र बहुधार्मिक विविधतामा रहेको उल्लेख गर्दै उनले यस विशिष्ट गुणलाई गुम्न दिन नहुनेमा उनले जोड दिएका छन् ।

‘हामी नेपालीहरू नेपाल निर्माणको सुरुआती समयदेखि नै परस्पर मिलिजुली, हाँसीखुसी एक अर्कामा माया प्रिती गाँसी बसेका जातजाति हौं’, सन्देशमा अगाडि भनिएको छ, ‘कोही कसैबाट यसमा खलल पार्ने काम हुनु हुँदैन ।’

उनले नेपालको विशिष्ट धार्मिक, सांस्कृतिक एवं सामाजिक गुणकै कारण विश्वमा नेपालको सम्मान रहेको स्मरण गराउँदै जुनसुकै भू–भागमा रहेका नेपालीहरूलाई पनि मिलेर बस्न आग्रह गरेका छन् ।

‘जुनसुकै भू–भागमा रहे बसेका जो कोही पनि हामी नेपाली मिलौं, हाम्रो यही आग्रह छ र यही आजको आवश्यकता हो,’ पूर्वराजाले सन्देशमा भनेका छन् ।