कोशीबाट मधेस पुगेको कप्तानगञ्जको आक्रोश

काठमाडौँ । गत आइतबार राति सुनसरीको देबानगञ्ज–३, कप्तानगञ्जमा दुई समूहका बीचमा भएको झडपको असर यति छिट्टै जिल्ला र प्रदेश नै पार गरेर मधेससम्म आइपुग्ला भनेर सरकारले सोचेकै थिएन।

सरकारले मात्रै होइन, राजनीतिक दलहरुले पनि कप्तानगञ्जको आक्रोशले विशाल रुप लिनेछ भने कल्पना गरेका थिएनन् । त्यसैले चार दिनसम्म सरकार र राजनीतिक दलहरु चुपचाप रहे ।

Watch On

कप्तानगञ्जको आक्रोश सुनसरी जिल्लाभर फैलिन थालेपछि बल्ल बुधबार सर्वदलीय बैठक बस्यो । सर्वदलीय बैठकको आह्वान सत्तारुढ रास्वपा सभापति रवि लामिछानेले गरेका थिए ।

सर्वदलीय बैठक बस्दासम्म पनि सरकारले ध्यान पुर्याएन ।

विहीबारसम्म आइपुग्दा सुनसरीको देवानगञ्जबाट सुरु भएको झडप धनुषा, सिरहा र पर्सासम्म पुग्यो । सिरहाको गोलबजारमा त प्रहरीको गोली लागी एक जनाको मृत्यु भयो ।

आइतबार रातिदेखि नै सुनसरीको देबानगञ्जमा कर्फ्र्यु छ । बिहीबार दिउँसोदेखि सिरहा, धनुषा र पर्सामा पनि कर्फ्यु लागेको छ ।

कर्फ्यु लागेको छ, तर प्रदर्शन रोकिएको छैन । झडप भइरहेको छ ।

चार जिल्लामा कर्फ्यु लागिसक्दा र तीन जनाको मृत्यु भइसक्दा बल्ल गृहमन्त्री विराटनगर पुगेका छन्– कप्तानगञ्जको घटनाबारे बुझ्न ।

कर्फ्यु लाग्नु भन्दा ठूलो कुरा कर्फ्यु लाग्नुको कारण हो । कर्फ्यु लगाइदिँदैमा प्रशासन(राज्य) को दायित्व पुरा हुँदैन ।

राज्यको दायित्व त कर्फ्यु लाग्ने वातावरण नै उत्पन्न हुन नदिनु हो ।

घटना कप्तानगञ्जको हो । समाधान पनि त्यहीँबाट खोजिनुपर्छ । कप्तानगञ्जलाई बाहिर राखेर समाधान निस्किँदैन । सरकारले सबैभन्दा पहिला यो बुझ्नुपर्छ ।

कप्तानगञ्ज झडपको पाँचौँ दिन कोशी प्रदेश पुगेको संघ सरकारले समाधान पहिल्याओस् । ढिला गर्यो भने आक्रोश मत्थर पार्न मुस्किल पर्न सक्छ ।