रवि लामिछानेलाई साक्षी राखेर मिल्यो धार्मिक अगुवाहरुको हात

काठमाडौँ । हिन्दु र मुस्लिम धर्मका अगुवाहरुले कुनै पनि अवस्थामा द्वन्द्व चर्किन नदिने र जारी तनावलाई तत्काल कम गर्न पहल गर्ने प्रतिबद्धता व्यक्त गरेका छन् ।

रास्वपा सभापति रवि लामिछानेले अज पार्टी संसदीय दल कार्यालयमा मौलाना नरुल हुसेन र मौलाना मोहम्मद खालिद तथा विश्व हिन्दु महासंघका महासचिव रामचन्द्र तिवारी र सचिवालय सदस्य राजुराज फुयालसँग गरेको छलफलमा दुवै धर्मका अगुवाहरुले धर्मका नाममा द्वन्द्व चर्कन नदिने प्रतिबद्धता व्यक्त गरेका हुन् ।

Watch On

सोही क्रममा दुवै धर्मका अगुवाहरुले सभापति रवि लामिछानेलाई साक्षी राखेर हात मिलाएका थिए ।

उनीहरुले तत्काल संयुक्त विज्ञप्ति निकाल्ने र सहिष्णुताका लागि अपिल गर्ने प्रतिबद्धता पनि व्यक्त गरेका छन् । 

त्यसअघि सभापति लामिछानेलेले प्रत्येक मिनेट महत्वपूर्ण छ भन्दै तत्काल अपिल जारी गर्न आग्रह गरेका थिए । 

यस्तो छ- रवि लामिछानेको आग्रह 
जुन सद्भावपूर्ण समाजको अभ्यास गरिरहेका छौं, त्यसमा राजनीति प्रवेश गर्यो भने बिथोलिएको देखेका छौँ । 
जब राजनीतिमा धर्म प्रवेश गर्छ र राजनीतिले धर्म छाड्छ, यस्तो अवस्था आउँछ । 
यस्तै बेला त हो नि नेतृत्व चाहिने । समाज आफैं चलेको अवस्थामा त नेतृत्वको खासै खाँचो हुँदैन । 
समाजलाई गाह्रो परेको बेला नेतृत्व चाहिने हो, हाम्रो भूमिका यस्तै बेला चाहिने हो । 
दुवै संस्थाहरुले साझा वक्तव्य जारी गरौं । अहिले प्रत्येक मिनेट महत्वपूर्ण छ । हामी सुरक्षामा छौं, हाम्रै कोही दाजुभाइ सुरक्षित छैनन्, त्रासमा छन् । 
मेरो अनुरोध मात्रै होइन, याचना नै गरेको छु, यो बेलामा हामीले अलिकति पनि ढिला गर्यौं भने अर्को विध्वंस निम्तिन सक्छ । जसले जुन उद्देश्यले आगो झोसेको भए पनि यसले डढाउने हामीलाई नै हो ।