पानी पार्ने प्रणाली नेपाल नजिक आएसँगै ठोरीदेखि सिमरासम्म भारी वर्षा

काठमाडौं । जल तथा मौसम विज्ञान विभागले ठोरीदेखि सिमरासम्म भारी वर्षा भएको बताएको छ ।

हाल पूर्वी नेपालमा पानी पार्ने प्रणाली नेपालनजिक आएको छ । मौसमको न्यून चापीय रेखा हाल पूर्वमा नेपालनजिक छ भने पश्चिममा सरदर स्थान (भारततर्फ) को आसपास छ ।

Watch On

ठोरीमा पछिल्लो २४ घन्टामा १५२.२, सिमरा विमानस्थल केन्द्रमा १५२, कोल्हुवा क्षेत्रमा १४२ मिलिमिटर वर्षा भएको छ ।

मौसमविद विनोद पोखरेलले मनसुनको न्यून चापीय रेखा (ट्रफ) नेपाल नजिक आएसँगै अहिले ठोरीदेखि सिमरासम्म भारी वर्षा भइरहेको बताएका छन् । 

आज बिहानसम्म बागमती, मधेसको पश्चिमीभेग हुँदै सुदूरपश्चिमसम्म केही ठाउँमा भारी वर्षाको सम्भावना रहेको पोखरेलले बताए । 

आज दिउँसो एकछिन पानी पर्न रोकिए पनि बेलुका फेरि राम्रै वर्षा हुने उनले बताए ।

पछिल्लो प्रणालीले नेपालभर वर्षा हुने सम्भावना रहे पनि तराई भेगमा भने सबैतिर पानी पर्ने सम्भावना नरहेको उनले बताए ।

जल तथा मौसम विज्ञान विभागले आज दिउँसो देशभर साधारणतया बादल लाग्ने बताएको छ । 

विभागका अनुसार आइतबार देशका हिमाली भू–भागका केही स्थानमा मध्यमसम्मको वर्षा/हिमपातको सम्भावना छ। देशका पहाडी भू–भागका धेरै स्थानमा मध्यमसम्मको वर्षाको सम्भावना छ। साथै तराई भू–भागका केही स्थानमा मध्यमसम्मको वर्षाको सम्भावना छ ।

कोशी, बागमती, गण्डकी, लुम्बिनी र कर्णाली प्रदेशका पहाडी भू–भागका एक–दुई स्थानमा भारी वर्षाको सम्भावना रहेको मौसम पूर्वानुमान महाशाखाले बताएको छ ।