ओखलढुङ्गामा दुई दशकदेखि निरन्तर झरिरहेको पहिरो

ओखलढुङ्गा । सिद्धिचरण नगरपालिका–५ डाँडाखर्कमा दुई दशकदेखि निरन्तर झरिरहेको पहिरोका कारण पाँच घरपरिवार उच्च जोखिममा परेका छन् ।

सिस्नेखोलाको कटानबाट सुरु भएको पहिरो दिनप्रतिदिन फैलिँदै गएपछि स्थानीय जोखिम मोलेरै बस्न बाध्य छन् । पहिरो केही परिवारको घरआँगनसम्मै पुगेको छ भने गाउँका करिब ४० परिवारसमेत जोखिममा रहेको स्थानीयले बताएका छन् ।

Watch On

डेढ दशकअघि यही वडाको चुप्लुमा पहिरोले घरखेत बगाएपछि डाँडाखर्कमा आएर घर बनाएका राईबहादुर राई अहिले फेरि पहिरोको जोखिममा छन् । 'चुप्लुमा पहिरोले उठिबास लगाएपछि ज्यान जोगाउन यहाँ आएर घर बनाएँ । अहिले फेरि यही घर बगाउने अवस्था आयो,' उनले भने ।

पहिरोले अहिलेसम्म सयौँ रोपनी खेतीयोग्य जमिन बगाइसकेको छ । खेतबारी नै पहिरोमा परिणत भएपछि स्थानीयको जीविकोपार्जनसमेत संकटमा परेको छ ।

पहिरो नियन्त्रणका लागि स्थानीय तह, प्रदेश र सङ्घीय सरकारसँग पटक–पटक आग्रह गरे पनि प्रभावकारी काम हुन नसकेको स्थानीयको गुनासो छ । पहिरोले जमिन बगाइसक्दा पनि सोही जग्गाको भूमिकर तिर्नुपरेको उनीहरू बताउँछन् ।

“जग्गाजमिन पहिरोले बगाइसक्यो, तर भूमिकर तिरिरहनुपरेको छ । राज्यबाट पहिरो नियन्त्रण र राहतका कार्यक्रम आएनन्,” पहिरोपीडित गीतामाया राईले भनिन् ।

स्थानीयले पहिरोको दीर्घकालीन प्राविधिक समाधानसँगै जोखिममा रहेका परिवारको सुरक्षित पुनःस्थापना र जीविकोपार्जनको व्यवस्था गर्न तीनै तहका सरकारसँग माग गरेका छन् ।