जब ज्यानको बाजी थापेर मिटरब्याज पीडित महिलालाई जोगाए प्रहरीले

वीरगन्ज । धनुषा जिल्ला अदालतको मूल गेटअगाडि बुधबार दिउँसो मिटरब्याज पीडित एक महिलाले आत्मदाहको प्रयास गरेपछि प्रहरीले तत्काल उद्धार गरेको छ ।

जनकपुरधाम उपमहानगरपालिका–४ की फुलकुमारी रजकले शरीरमा पेट्रोल खन्याएर आत्मदाहको प्रयास गरेकी थिइन् । उनलाई रोक्ने क्रममा प्रहरी निरीक्षक अरविन्द साह स्वयं जोखिममा परेका थिए ।

Watch On

मिटरब्याज पीडितहरूले अदालतअगाडि विरोध प्रदर्शन गरिरहेका बेला रजकले कालो प्लास्टिकमा लुकाएर बोतलमा पेट्रोल ल्याएकी थिइन् । प्रदर्शनका क्रममा उनी तनावमा देखिएकी थिइन् र हातमा रहेको बोतल उचाल्दै नारा लगाइरहेकी थिइन् ।

प्रदर्शन सकिन लाग्दा उनले अचानक शरीरमा पेट्रोल खन्याएर आत्मदाहको प्रयास गरेकी थिइन् । त्यसलगत्तै प्रहरी निरीक्षक साह दौडिँदै पुगेर उनको हातबाट पेट्रोलको बोतल खोसेका थिए ।

साहले रजकले सलाई कोर्नुअघि नै बोतल खोसेका कारण सम्भावित ठूलो दुर्घटना टरेको हो । बोतल खोस्ने क्रममा पेट्रोल साहको पोशाकमा समेत छरिएको थियो ।

प्रत्यक्षदर्शीका अनुसार प्रहरी निरीक्षक साह केही सेकेन्ड ढिला पुगेको भए रजकसँगै उनी स्वयं पनि आगाको जोखिममा पर्न सक्ने अवस्था थियो ।

प्रहरीले रजकलाई तत्काल उद्धार गरी उपचारका लागि प्रादेशिक अस्पताल जनकपुर पठाएको छ ।

मिटरब्याजसम्बन्धी मुद्दामा पक्राउ परेका गोपाल साह, रेखा साह र हरेराम साहविरुद्ध धनुषा जिल्ला अदालतमा थुनछेक बहस भइरहेको छ । उनीहरूको पेसीका क्रममा दबाब दिन मिटरब्याज पीडितहरू गोविन्दकुमार साहको नेतृत्वमा भूतनाथ मन्दिरनजिक भेला भएका थिए ।

पीडितहरूले त्यहाँबाट पैदल ¥याली निकाल्दै कदमचोक, जिल्ला प्रशासन कार्यालय र जिल्ला प्रहरी कार्यालय हुँदै जिल्ला अदालतको मूल गेटअगाडि पुगेर विरोध प्रदर्शन गरेका थिए ।

प्रदर्शनमा पीडितहरूले आफूहरूमाथि भएको अन्यायको न्यायिक समाधान, दोषीमाथि कारबाही र आफूहरूले न्याय पाउनुपर्ने माग गरेका थिए ।

प्रहरी निरीक्षक साहको तत्कालको हस्तक्षेपले भने प्रदर्शनकै क्रममा हुन लागेको सम्भावित ठूलो दुर्घटना टरेको छ ।