गुण्डुमा ढलेका जेएनविरूद्ध अविश्वासको प्रस्ताव दर्ता

काठमाडौं । नेकपा एमाले बागमती संसदीय दल नेता जेएन थपलियाविरूद्ध अविश्वासको प्रस्ताव दर्ता भएको छ ।

एमाले सांसद केशवप्रसाद पोखरेलका अनुसार थपलियाविरूद्ध बुधबार संसदीय दलमा अविश्वास प्रस्ताव दर्ता भएको हो । २५ मध्ये १८ सांसदको हस्ताक्षर आएको उनले बताए ।

Watch On

यद्यपि कतिपयलाई छलफल मात्रै गर्ने भन्दै बोलाएर हस्ताक्षर गरेकाले त्यति नै संख्या कायम नहुने सम्भावना रहेको उनले बताए ।

नेपाली कम्युनिस्ट पार्टीसँग तीन बुँदे सहमति भएर प्रदेश सरकार बाँडफाँड भएपछि एमालेले दल नेता फेर्ने कसरत थालेको थियो । पार्टी बागमती इन्चार्ज महेश बस्नेत आफै सक्रिय बनेका थिए ।

उनैले सांसदहरूको हस्ताक्षर गराएका थिए । उनको चाहना किरण थापामगरलाई दल नेता बनाउने छ ।

अध्यक्ष केपी शर्मा ओली आफैले थपलियालाई दल नेता छाड्न भनेका थिए । त्यही विवादका कारण थपलिया अध्यक्ष ओलीनिवास गुण्डुमा अचेत भएर ढलेका थिए । उनी मंगलबार अस्पतालबाट डिस्चार्ज भएका छन् । डिस्चार्ज भएको भोलिपल्टै उनीविरूद्ध अविश्वास प्रस्ताव दर्ता भएको हो ।

बागमतीमा अहिले नेपाली कांग्रेसका दल नेता इन्द्र बानियाँ मुख्यमन्त्री छन् । कांग्रेसका ३६ सांसद छन् । दोस्रो ठूलो दल नेकपासँग २६ सांसद छन् । सरकार चलाउन आवश्यक बहुमत कसैसँग नभएकाले अब ठूलो दलको नेतृत्वमा सरकार बन्ने सम्भावना रहेको नेताहरूले बताएका छन् ।

त्यहाँ १२ सांसद रहेको राप्रपा निर्णायक छ । तर उसले कसैलाई साथ नदिने बताएको छ ।

१०४ सदस्यीय प्रदेश सभामा सरकार बनाउन ५३ मत आवश्यक पर्छ ।