मुख्य समाचार

प्युठानका विभिन्न खोलामा पाँच बेवारिसे शव फेला

सिधाकुरा

बिहीबार, साउन २८, २०८३

प्युठानका विभिन्न खोलामा पाँच बेवारिसे शव फेला

प्युठान । स्वर्गद्वारी नगरपालिकाका विभिन्न स्थानमा रहेका खोलाको किनारमा पाँच जनाको बेवारिसे शव फेला परेको छ।

बिहीबार बिहान करिब ७ः३० बजे नगरपालिकाका विभिन्न स्थानमा नाम, थर र वतन नखुलेका पाँच जनाको शव फेला परेको जिल्ला प्रहरी कार्यालय प्युठानले जनाएको छ।

Watch On

स्वर्गद्वारी–९ जुडापाटास्थित माडी खोलाको किनारमा करिब १२/१३ वर्षका बालकको शव फेला परेको छ। त्यस्तै स्वर्गद्वारी–३ किमिचौरस्थित माडी खोलाको किनारमा कम्मरभन्दा माथिको भाग मात्र रहेको पुरुषको शव फेला परेको प्रहरीले जनाएको छ।

स्वर्गद्वारी–४ गोठीबाङस्थित माडी खोलाको किनारमा एक महिलाको शव फेला परेको छ। स्वर्गद्वारी–५ सरोजास्थित लुङ्ग्री खोलाको किनारमा पनि दुई महिलाको शव फेला परेको छ। तीमध्ये एक शवको बायाँ खुट्टा घुँडादेखि तलको भाग नभएको प्रहरीले जनाएको छ।

फेला परेका सबै शवको पहिचान खुल्न सकेको छैन। शवको पहिचान तथा घटनाबारे थप अनुसन्धान भइरहेको प्रहरीले जनाएको छ।

प्रहरीका अनुसार हालसम्म परिवार वा आफन्तको पहिचान हुन नसकेकाले कोही व्यक्तिको परिवारका सदस्य हराइरहेको भए जिल्ला प्रहरी कार्यालय प्युठानमा सम्पर्क गर्न अनुरोध गरिएको छ।

सम्पर्क नम्बर: ९८५७८३७०४९, ९८५७८१५५५५

प्रकाशित मिति: बिहीबार, साउन २८, २०८३

प्रतिक्रिया दिनुहोस्