रोल्पा पहिरोमा ७ जनाको मृत्यु भएपछि रास्वपाले सरकारको ध्यानाकर्षण गरायो

काठमाडौं । राष्ट्रिय स्वतन्त्र पार्टी (रास्वपा)ले रोल्पाको थवाङ गाउँपालिका–५, कोतलाबाङमा गएको भीषण पहिरोमा परी ७ जनाको मृत्यु र ५ जना बेपत्ता भएको घटनाप्रति दुःख व्यक्त गर्दै प्रभावकारी उद्धार र खोजी कार्यमा जुट्न सरकारको ध्यानाकर्षण गराएको छ ।

रास्वपाका महामन्त्री विपिनकुमार आचार्यले बिहीबार विज्ञप्ति जारी गर्दै अविरल वर्षाका कारण बुधबार राति गएको पहिरोमा परी ज्यान गुमाउनेहरूप्रति श्रद्धाञ्जली र शोकाकुल परिवारमा समवेदना व्यक्त गरेका छन् । उनले घाइतेहरूको शीघ्र स्वास्थ्य लाभको कामना गर्दै बेपत्ताको प्रभावकारी खोजी गर्न सरकारसँग आग्रह गरेका छन् ।

Watch On

रास्वपाले पछिल्लो २४ घण्टामा रोल्पालगायत देशका विभिन्न भागमा बाढी र पहिरोले ठूलो क्षति पुर्‍याएको भन्दै विपद्को अवस्थामा उद्धारमा खटिएका सुरक्षाकर्मी र स्थानीय नागरिकको प्रयासको प्रशंसा गरेको छ ।

तर राज्यको दायित्व उद्धारमा मात्रै सीमित हुन नहुने रास्वपाको भनाइ छ । विपद् आएपछि मात्रै राज्य संयन्त्र सक्रिय हुने तथा पूर्वतयारीमा सधैं चुक्ने परम्परागत कार्यशैलीका कारण नागरिकले बर्सेनि ज्यान गुमाउनुपरेको भन्दै पार्टीले विपद् जोखिम न्यूनीकरणमा थप जिम्मेवार र जवाफदेही बन्न सरकारसँग आग्रह गरेको छ ।

रास्वपाले संघ, प्रदेश र स्थानीय तीनै तहका सरकारलाई विपद्को पूर्वसूचना प्रणाली प्रभावकारी बनाउन, जोखिमयुक्त बस्ती पहिचान गरी सुरक्षित स्थानमा स्थानान्तरण गर्न तथा प्रभावित क्षेत्रमा तत्काल उद्धार, राहत र निःशुल्क उपचारको व्यवस्था गर्न आग्रह गरेको छ ।

निरन्तरको वर्षाका कारण देशभरको जनजीवन, सडक सञ्जाल र बस्ती जोखिमपूर्ण बनेको भन्दै रास्वपाले नागरिकलाई उच्च सतर्कता अपनाउन अपिलसमेत गरेको छ । अत्यावश्यक कामबाहेक यात्रा नगर्न तथा नदी किनार र पहिरोको जोखिम भएका क्षेत्रमा विशेष सावधानी अपनाउन पार्टीले आग्रह गरेको छ ।

‘विपद्को यस घडीमा राज्य आफ्ना नागरिकको अभिभावक बनेर उभियोस्, रास्वपा सदैव प्रभावित क्षेत्रका नागरिकको साथमा छ,’ विज्ञप्तिमा भनिएको छ ।

रास्वपाले पार्टीको देशभरको संयन्त्रलाई विपद् पूर्वतयारी तथा विपद्पछिको उद्धार र राहत कार्यमा राज्यका संयन्त्रलाई सहयोग गर्न चौबीसै घण्टा तयार रहनसमेत अनुरोध गरेको छ ।