नेकपा बहुमतले सुरु गर्‍यो व्यवसायी धम्क्याउँदै चन्दा असुली

काठमाडौं । नेपाल कम्युनिस्ट पार्टी (बहुमत) ले पाँचौँ अधिवेशनका नाममा व्यापारीहरूसँग चन्दा असुल्न थालेको छ ।

सिधाकुराको सम्पर्कमा आएको एक व्यवसायीले आफूलाई पत्र पठाएर ठूलो रकम माग भएको दाबी गरे ।

Watch On

विभिन्न नम्बरहरूबाट धम्कीपूर्ण भाषा प्रयोग गर्दै चन्दा मागिएको, नदिए जे पनि हुनसक्ने भन्दै धम्क्याइएको उनले बताए ।

सिधाकुराले धर्मेन्द्र बास्तोला ‘कञ्चन’ले हस्ताक्षर गरेको पत्र फेला पारेको छ । 

‘हामी नेपाली जनता मात्र पार्टीको पाँचौँ अधिवेशनमार्फत हामी आफ्ना नेपाली जनतालाई देशी विदेशीको श्रमबाट मुक्त दिनको लागि यही २०८३ साल भाद्र १ र २ गते काठमाडौंमा हुन गइरहेको हुनाले आ–आफ्नो ठाउँबाट आर्थिक सहयोग उपलब्ध गराई दिनु हुन विनम्र अनुरोध छ,’ पत्रमा भनिएको छ।

उक्त पत्रमा नेपाली श्रमजीवी, मजदुर तथा किसान वर्गमा राष्ट्रिय स्वामित्वका लागि मुक्ति र सम्मुनतिको खुसी तथा अधिकारका लागि जस्तोसुकै चुनौती, धक्का, छलाङ, कठिनाइ र महाविपत्तिसमेत सहन सक्ने क्षमता प्राप्त भएको दाबी गरिएको छ।

पत्रमा यस्तो क्षमता स्वतः उत्पन्न नभएको भन्दै नेपाली क्रान्तिकारी जनता, मजदुर तथा किसानले आफ्नो हक र अधिकारका लागि दलाल तथा नोकरशाही पुँजीपति वर्गसँग गरेको संघर्ष र आमूल परिवर्तनको निम्ति भएको वर्गसंघर्षबाट उक्त क्षमता निर्माण भएको उल्लेख छ।

नेकपा (बहुमत)ले नेपाली जनतालाई देशी–विदेशीको श्रमबाट मुक्त गर्न पार्टीको पाँचौँ अधिवेशनमार्फत भूमिका निर्वाह गर्ने दाबीसमेत गरेको छ।

पार्टीले अधिवेशन सम्पन्न गर्न आर्थिक सहयोग मागे पनि पत्रमा सहयोगको निश्चित रकम भने उल्लेख गरिएको छैन।