ग्यास अभाव भएका उपभोक्ताका लागि निगमले तोक्यो काठमाडौँमा पाँच बिक्रीस्थल

काठमाडौँ । खाना पकाउने एलपी ग्यासको अभाव झेलिरहेका उपभोक्तालाई लक्षित गर्दै नेपाल आयल निगमले काठमाडौँका पाँच स्थानबाट विभिन्न ब्रान्डका ग्यास सिलिन्डर बिक्री गर्ने व्यवस्था मिलाएको छ। 

जिल्ला प्रशासन कार्यालय काठमाडौँ र नेपाल आयल निगमको समन्वयमा शनिबारदेखि काठमाडौँका विभिन्न स्थानमा ग्यास उद्योगबाट तोकिएका ब्रान्डका ग्यास सिलिन्डर बिक्री वितरण गरिने निगमले जनाएको छ।

Watch On

निगमका अनुसार टेकुस्थित निगमको परिसरबाट नेपाल, एचपी, एभरेस्टरसुगम, श्रीराम, सगर, सिद्धार्थ, श्री र हिमाल ब्रान्डका ग्यास बिक्री गरिनेछ। त्यस्तै, चाबहिलस्थित यातायात कार्यालय परिसरबाट नेपाल र एचपी ब्रान्डका ग्यास उपलब्ध हुनेछन्।

कीर्तिपुरको राधास्वामी परिसरबाट नेपाल, एचपी, एभरेस्टरसुगम, श्रीमाया, श्रीकृष्ण, साईबाबा र ओम ब्रान्डका ग्यास बिक्री गरिनेछ। बसुन्धरास्थित राधास्वामी परिसरबाट नेपाल, एचपी, एभरेस्टरसुगम, भानु र ओम ब्रान्डका ग्यास बिक्री गर्ने व्यवस्था गरिएको छ।

त्यसैगरी बबरमहलस्थित पुरानो जिल्ला प्रशासन कार्यालय परिसरबाट नेपाल, एचपी, एभरेस्टरसुगम, श्रीराम, सगर, हिमाल, एसटीसी, लोकप्रिय र सूर्य ब्रान्डका ग्यास बिक्री गरिने निगमले जनाएको छ।

निगमले एलपी ग्यासको आयात नियमित रूपमा भइरहेको र सम्बन्धित उद्योगहरूले आफ्ना विक्रेतामार्फत बिक्री वितरण पनि नियमित गरिरहेको जनाएको छ। अत्यावश्यक परेका उपभोक्ताले मात्र नागरिकता वा राष्ट्रिय परिचयपत्रसहित बिहान १० बजेदेखि साँझ ६ बजेसम्म तोकिएका बिक्रीस्थलमा उपस्थित भई ग्यास खरिद गर्न सक्ने निगमले अनुरोध गरेको छ।

निगमले ग्यासको अनावश्यक सञ्चिति नगर्न तथा वास्तविक आवश्यकता भएका उपभोक्तालाई मात्र तोकिएका स्थानबाट ग्यास खरिद गर्न आग्रह गरेको छ।