साउन ३१ गते यी सात स्थानबाट ग्यास वितरण हुने

काठमाडौं । खाना पकाउने एलपी ग्यासको अभाव झेलिरहेका उपभोक्तालाई लक्षित गर्दै नेपाल आयल निगमले काठमाडौंका विभिन्न सात स्थानबाट ग्यास सिलिन्डर बिक्री–वितरण गर्ने भएको छ।

निगमले जिल्ला प्रशासन कार्यालय काठमाडौंसँगको समन्वयमा साउन ३१ गते आइतबार तोकिएका स्थानबाट विभिन्न ब्रान्डका ग्यास सिलिन्डर बिक्री–वितरण गर्ने जनाएको छ। निगमका अनुसार ग्यास खरिदका लागि उपभोक्ताले बिहान ११ बजेदेखि साँझ ५ बजेसम्म तोकिएका बिक्री केन्द्रमा उपस्थित हुन सक्नेछन् ।

Watch On

निगमले सार्वजनिक गरेको विवरणअनुसार ग्यास बिक्री हुने स्थान र उपलब्ध ब्रान्ड यसप्रकार छन् :

निगमको टेकु परिसर : नेपाल, एचपी, एभरेस्ट/सुगम, श्रीराम र सगर।
पशु सेवा शाखा, चपली, बूढानीलकण्ठ : नेपाल, एचपी र भानु।
राधास्वामी, कीर्तिपुर परिसर : नेपाल, एचपी, एभरेस्ट/सुगम, श्रीकृष्ण, साइजवाला र श्रीमाया।
नयाँ बजार जुडो हल परिसर : नेपाल, एचपी र ओम।
तारकेश्वर नगरपालिकाको परिसर : नेपाल र एचपी।
चन्द्रागिरी नगरपालिका कार्यालय : लोकप्रिय, नेपाल, एचपी र श्रीमाया।
राष्ट्रिय क्षयरोग केन्द्र, ठिमी : नेपाल, एचपी, सूर्य, सगर, एभरेस्ट/सुगम र एसटीसी।

निगमले ग्यास खरिद गर्न आउने उपभोक्ताले आफ्नो नागरिकता वा राष्ट्रिय परिचयपत्र अनिवार्य रूपमा साथमा ल्याउनुपर्ने जनाएको छ। अत्यावश्यक परेका उपभोक्तालाई मात्र तोकिएका स्थानमा उपस्थित भएर ग्यास खरिद गर्न निगमले आग्रह गरेको छ।

यसअघि पनि ग्यास अभाव भएपछि निगम र जिल्ला प्रशासन कार्यालयको समन्वयमा विभिन्न स्थानबाट ग्यास बिक्री–वितरण गरिएको थियो।

निगमले बजारमा एलपी ग्यासको आयात तथा बिक्री–वितरण भइरहेको जनाउँदै अनावश्यक रूपमा ग्यास मौज्दात नराख्न र आवश्यकताअनुसार मात्रै खरिद गर्न उपभोक्तालाई आग्रह गर्दै आएको छ।