पार्टी पुनर्गठनबारे रामकुमारी र उषाकिरणको चल्यो सवालजवाफ

काठमाडौं । नेकपा एमालेभित्र पुनर्गठनको प्रश्न निकै पेचिलो बनेको छ ।

केन्द्रीय सदस्य रामकुमारी झाक्रीले पार्टी अध्यक्ष केपी शर्मा ओलीलाई हटाउने र बाँकी संरचना र शैलीलाई यथावत राख्ने हो भने पुनर्गठन भन्न मिल्ने कि नमिल्ने भन्दै प्रश्न गरेकी छन् । 

Watch On

‘यदि पुनर्गठनको अर्थ एक जना अध्यक्ष हटाउने र बाँकी पुरानै संरचना, पुरानै कार्यशैली, पुरानै अनुहार र पुरानै शक्ति सम्बन्ध कायम राख्ने हो भने त्यसलाई पुनर्गठन भन्न मिल्छ कि मिल्दैन ?,’ उनले भनेकी छन् ।

जेनजी आन्दोलनअघि गत भदौ २० देखि २२ गतेसम्म भएको विधान महाधिवेशन आन्तरिक लोकतन्त्रको प्रश्न किन उठेन भनेर प्रश्न गरेकी छन् ।
‘अझ रोचक कुरा के छ भने जेनजी आन्दोलन हुनुभन्दा दुई दिनअघि नै एमालेको विधान महाधिवेशनमा आन्तरिक लोकतन्त्रको प्रश्न किन उठेन ?,’ उनको प्रश्न छ ।

यसको केन्द्रीय सल्लाहकार परिषद् सदस्य उषाकिरण तिम्सेनाले जवाफ दिएकी छन् ।

‘दिदीसँग सवाल गर्न मन त थिएन । र अध्यक्षले यो परिस्थितिमा पनि जवाफदेही हुन नपर्ने हो भने सुधारिएको पञ्चायत ठिक थियो । र आन्तरिक लोकतन्त्रको हुर्मत कसरी लिइएको थियो ? यहाँलाई जानकारी छैन भने म हजुरलाई भेटेरै भन्छु,’ तिम्सेनाको जवाफ छ ।
गत फागुन २१ को निर्वाचनपछि एमालेभित्र पुनर्गठनको प्रश्न सघन बनेको छ । संस्थापन समूहबाटै अध्यक्ष ओलीको विकल्प खोजिएपछि अहिले बहस बाक्लिएको छ ।

ओली आफ्नो पुरानो समूहलाई मनाउने कोसिसमा छन् । एमालेका कार्यकर्ता पुनर्गठनबारे विचार–विमर्श गरिरहेका छन् ।