समाज

शिक्षण अस्पतालले भन्यो– शव राख्ने ठाउँ छैन

सिधाकुरा

आइतबार, भदौ १४, २०८३

शिक्षण अस्पतालले भन्यो– शव राख्ने ठाउँ छैन

त्रिवि शिक्षण अस्पतालका प्रवक्ता प्रा.डा. गोपाल सेढाईं

काठमाडौँ । त्रिवि शिक्षण अस्पताल महाराजगञ्जले भोटेकोशी बाढीमा परी मृत्यु भएका व्यक्तिहरुको शव सुरक्षित राख्न समस्या भएको जनाएको छ ।

Watch On

पहिचान नभएका शव सुरक्षित राख्न नसकिएको भन्दै अस्पतालले शवहरुको व्यवस्थापनका लागि आवश्यक निर्णय जिल्ला प्रशासन कार्यालय काठमाडौँलाई आग्रह गरेको छ ।

त्रिवि शिक्षण अस्पतालका प्रवक्ता प्रा.डा. गोपाल सेढाईंले अहिले अस्पतालमा पहिचान नभएका ५१ शव छन् । अस्पतालमा ५९ शव रहेकोमा ८ जनाको पहिचानपछि आफन्तलाई हस्तान्तरण गरिएको पनि उनले जानकारी दिए । ‘अब पहिचान नभएका शव राख्ने हाम्रो क्षमता छैन, चितवनमा जस्तैगरी भए पनि व्यवस्थापनका लागि सीडीओ कार्यालयसँग समन्वय गरिरहेका छौँ’ उनले भने ।

अहिलेसम्म ५६ जनालाई उपचारका लागि अस्पताल ल्याइएकोमा एक जनाको मृत्यु भएको पनि उनले जानकारी दिए । ‘हामी जति पनि बिरामीको उपचार गर्न समक्ष छौँ’ डा. सेढाईंले भने ‘शव सुरक्षित राख्ने क्षमता कम छ।’

त्रिवि शिक्षण अस्पतालमा उद्धार गरेर ल्याइएका बिरामीहरुको उपचार भइरहँदा सम्पर्कविहीन व्यक्तिका आफन्तको पनि भीड लागेको छ । अस्पतालका भित्तामा सम्पर्कविहीन व्यक्तिहरुको तस्वीरसहितको विवरण टाँसिएको छ ।

प्रकाशित मिति: आइतबार, भदौ १४, २०८३

प्रतिक्रिया दिनुहोस्