भारतीय कारले ठक्कर दिएर सांसदका स्वकीए सचिव फरार, महिला गम्भिर घाइते

काठमाडौँ । नेकपा एमालेबाट निर्वाचित पर्सा क्षेत्र नम्बर ३ का सांसद राजकुमार गुप्ताका स्वकीय सचिव मोहम्मद निजामले चलाएको कारको ठक्करले एक महिला गम्भिर घाइते भएकी छिन् । 

निजामले चलाएको सवारीले मोटरसाइकललाई ठक्कर दिइ उनी फरार भएको पर्सा प्रहरीले जनाएको छ । वीरगंजको लिंकरोडस्थित ना ५० प ६५४० नम्बरको मोटरसाइकललाई सांसद राजकुमार गुप्ताका स्वकीय सचिव मोहम्मद निजामले चलाएको भारतीय नम्बर (बिआर ०६ सिएक्स ५०२६) को कारले ठक्कर दिदा बाइकको पछाडी बसेकी महिला गम्भीर घाईते भएकी हुन् । 

घाइते हुनेमा कलैया उपमहानगरपालिका–१२ शितलपुरकी विन्दु देवी रहेकी छिन् । दुर्घटनामा परी उनको छाती र टाउकोमा गम्भिर चोट लागेको छ । उनको टाउकोको शल्यक्रिया गरिएको मेडिसिटी अस्पताल स्रोतले जनाएको छ । 

ठक्करका कारण मोटरसाइकल चालक रमेश साह पनि घाइते भएका छन् । गम्भिर घाइते भएकी विन्दु देवीको भने वीरगंजस्थित एल.एस.न्यूरो अस्पतालमा उपचार हुन नसकेपछि आइतबारनै काठमाडौँस्थित नेपाल मेडिसिटी अस्पतालमा ल्याइएको थियो । फरार रहेका स्वकीय सचिव मोहम्मद निजामको भने खोजि भइरहेको पर्सा प्रहरीले जनाएको छ । 

ठक्कर लगत्तै स्वकीय सचिवले चलाएकाे कारमा सवार सांसद राजकुमार गुप्ताका छोरा रवि गुप्ताले प्रहरीसँग उल्टै विवाद गरेका थिए । प्रहरीलाई गाली गलौज गरेका सांसद गुप्ताका छोरालाई भने प्रहरीले केही बेर नियन्त्रणमा लिएर छाडेको जिल्ला प्रहरी कार्यालय पर्साका प्रमुख कोमल साहले बताए । 

दुर्घटनापछि उपचार खर्च उपलब्ध गराउन पीडक पक्षले आनाकानी गरिरहेको घाइते विन्दु देवीकी आफन्त तथा प्रतिनिधिसभा सदस्य समेत रहेकी ज्वाल साहले बताइन् । सांसद साह भन्छिन्, ‘घटना दुर्घटना हुन्छ, तर दुर्घटना हुनासाथ पीडितको उपचार लगायतको खर्चमा तदारुकता देखाउनुपथ्र्यो त्यस्तो नगरी उल्टै धाकधम्की दिने कार्य भइरहेको छ ।’

उनका अनुसार अपरेसन लगायतको खर्च ६ लाख भन्दा बढी लागेको छ । थप उपचार बाँकी नै छ । तर पिडक पक्षले २ लाख ५० हजार मात्रै उपलब्ध गराएको छ ।