न्युयोर्कमा परराष्ट्रमन्त्री खनालको ईयू र पोल्यान्डका उच्च अधिकारीसँग भेटवार्ता

काठमाडौं । परराष्ट्रमन्त्री शिशिर खनालले युरोपेली संघ (ईयू) की कार्यकारी उपाध्यक्ष टेरेसा रिबेरा र पोल्यान्डका उपप्रधानमन्त्री तथा परराष्ट्रमन्त्री राडोस्ल सिकोरस्कीसँग छुट्टाछुट्टै भेटवार्ता गरेका छन्।

Watch On

संयुक्त राष्ट्रसंघको मुख्यालय न्युयोर्कमा जारी संयुक्त राष्ट्रसंघको ८१औँ महासभाका अवसरमा भएका भेटवार्तामा नेपाल–ईयू तथा नेपाल–पोल्यान्ड सम्बन्धका विविध पक्षमा छलफल भएको हो।

ईयूकी कार्यकारी उपाध्यक्ष रिबेरासँगको भेटमा परराष्ट्रमन्त्री खनालले भोटेकोशी बाढीपछि नेपालको कठिन परिस्थितिप्रति संवेदना र ऐक्यबद्धता व्यक्त गर्दै रिबेराले दिएको सन्देशप्रति कृतज्ञता व्यक्त गरेका थिए।

भेटमा नेपाल र ईयूबीचको साझेदारीका विविध आयामबारे महत्वपूर्ण विचार आदानप्रदान भएको थियो। बाढीबाट प्रभावित क्षेत्रमा पुनःस्थापना तथा पुनर्निर्माणका लागि नेपाल र ईयूबीचको सहकार्यलाई थप गहिरो बनाउने विषयमा पनि छलफल भएको थियो।

त्यस्तै, नेपाल र ईयूबीच आपसी हितका विभिन्न क्षेत्रमा सहकार्य विस्तार गर्ने तथा साझेदारीलाई थप प्रभावकारी बनाउने विषयमा दुवै पक्षले जोड दिएका थिए।

यसैगरी, पोल्यान्डका उपप्रधानमन्त्री तथा परराष्ट्रमन्त्री राडोस्ल सिकोरस्कीसँगको भेटमा नेपाल–पोल्यान्ड सम्बन्धका विविध पक्षमा छलफल भएको थियो।

भेटमा दुवै पक्षले दुई देशबीच बढ्दै गएको सम्बन्धलाई थप सुदृढ बनाउने विषयमा विचार आदानप्रदान गरेका थिए। साथै, आपसी हितका विभिन्न क्षेत्रमा द्विपक्षीय सहकार्य विस्तार गर्ने विषयमा समेत छलफल भएको थियो।

संयुक्त राष्ट्रसंघलगायत बहुपक्षीय मञ्चमा नेपाल र पोल्यान्डबीचको सहकार्यलाई अझ प्रभावकारी बनाउने विषयमा पनि दुवै पक्षले जोड दिएका थिए।