एमाले केन्द्रीय कमिटी आज पनि बस्दै, ओलीको कार्यशैलीको प्रतिवाद गर्न पोखरेललाई आग्रह

काठमाडौं । नेकपा एमालेको केन्द्रीय कमिटी बैठक मंगलबार पनि बस्दैछ। सोमबारदेखि ललितपुरको भनिमण्डलस्थित रामबाग पार्टी प्यालेसमा सुरु भएको बैठकमा अध्यक्ष केपी शर्मा ओलीले राजनीतिक प्रतिवेदन प्रस्तुत गरेका छन्।

Watch On

सोमबारको बैठकमा अध्यक्ष ओलीले पार्टीको स्थापित विधि र परम्पराअनुसार महासचिव शंकर पोखरेललाई बैठक सञ्चालनको जिम्मेवारी नदिएको भन्दै केही केन्द्रीय सदस्य असन्तुष्ट बनेका छन्। उनीहरूले अध्यक्ष ओलीको कार्यशैलीको प्रतिवाद गर्न महासचिव पोखरेललाई आग्रह गरेका छन्।

एक नेताका अनुसार अध्यक्ष ओलीले बैठक आफैं सञ्चालन गर्दै राष्ट्रिय गानदेखि सहिदप्रति सम्मान र वक्ताहरूको समय निर्धारणसम्मका काम आफैं गरेका थिए। यस क्रममा महासचिव पोखरेललाई बैठक सञ्चालनको अवसर नदिइएको भन्दै केन्द्रीय सदस्यहरूले असन्तुष्टि जनाएका हुन्।

‘प्रतिवेदनमा मीठा कुरा लेखेर ल्याउने तर आफैं त्यसको उल्लंघन गर्ने, सचिवालय तहका नेताहरूको मानमर्दन गर्ने र महासचिव पोखरेललाई चरम अपमान गर्ने ओलीको कार्यशैली देखियो। आज हामीले प्रतिवाद गर्न भनेका छौं,’ ती नेताले भने।

यसैबीच, पार्टी पुनर्गठन कार्यदलले चार महिना लगाएर १३ वटा क्षेत्रबाट सुझाव संकलन गरी तयार पारेको प्रतिवेदन भने केन्द्रीय कमिटी बैठकमा प्रस्तुत भएको छैन।

अध्यक्ष ओलीले सोमबारको बैठकमा सचिवालयले गठन गरेको कार्यदलको प्रतिवेदन सचिवालयमै बुझाइसकिएको र त्यसलाई सचिवालयले सम्पत्तिका रूपमा ग्रहण गरिसकेको बताएका थिए।

मंगलबारको बैठकमा अध्यक्ष ओलीले प्रस्तुत गरेको राजनीतिक प्रतिवेदनमाथि केन्द्रीय सदस्यहरूले धारणा राख्नेछन्। २९९ सदस्यीय केन्द्रीय कमिटीमा बोल्न चाहने सदस्यले हात उठाएर नाम टिपाएपछि बोल्ने समय दिइने र प्रत्येक वक्तालाई तीन मिनेटको समय निर्धारण गरिएको छ।

बैठकका लागि नौ वटा कार्यसूची तय गरिएको छ। अध्यक्षको प्रतिवेदनमाथि छलफलसँगै केन्द्रीय कमिटीमा मनोनयन, विभाग गठन, पोलिटब्युरो तथा स्थायी समिति गठन, सल्लाहकार परिषद्, ज्येष्ठ कम्युनिस्ट मञ्च र अनुशासन आयोग गठनलगायत विषय बैठकका एजेन्डा छन्। समसामयिक राजनीतिक प्रस्तावमाथि छलफल गर्ने कार्यसूचीसमेत रहेको छ।

बैठकको माइन्युट लेखनको जिम्मेवारी उपाध्यक्षद्वय विष्णुप्रसाद पौडेल र गोकर्ण विष्ट तथा महासचिव शंकर पोखरेललाई दिइएको छ। बैठकमा उठ्ने विषय तथा बहसलाई व्यवस्थित रूपमा टिपोट गर्न योगेश भट्टराई, पद्मा अर्याल, सूर्य थापा, निरज आचार्य र खिमलाल भट्टराई सम्मिलित ‘बहस नोट कमिटी’ गठन गरिएको छ।

बैठकले राजनीतिक प्रतिवेदनमाथिको छलफलसँगै पार्टीको आगामी सांगठनिक संरचना र कार्यदिशासम्बन्धी निर्णय गर्ने एमालेले जनाएको छ।