नेभिगेशन
समाज

भोटेकोशी बाढीबाट रसुवामा मात्र २३६ शव प्राप्त, ३९०६ जना अझै सम्पर्कविहीन

काठमाडौं । गत भदौ १० गते भोटेकोशीमा आएको बाढी तथा त्यसपछिको विपद्बाट हालसम्म रसुवामा २३६ वटा शव प्राप्त भएको छ। जिल्ला आपतकालीन कार्य सञ्चालन केन्द्र, रसुवाले असोज ५ गते साँझ ५ः२० बजेसम्म तयार पारेको विवरणअनुसार प्राप्त शवमध्ये १९४ वटा पहिचान हुन सक्ने र ४२ वटा पहिचान नखुलेका छन्।

Watch On

Facebook Tiktok Youtube Instagram Twitter

पहिचान हुन सक्ने शवमध्ये ३८ वटा महिला र १५६ वटा पुरुषका छन्। प्राप्त २३६ शवमध्ये १७ जनाको सनाखत भइसकेको छ भने २१९ जनाको सनाखत हुन बाँकी छ। ६९ शवको मुचुल्का मात्र भएको र १३८ शवको मुचुल्कासँगै डीएनए संकलन गरिएको केन्द्रले जनाएको छ। चार शव काठमाडौं र २२१ शव नुवाकोट पठाइएको छ।

Marvel
Extreme Energy

हराएका व्यक्तिका आफन्तमध्ये धुन्चे अस्पतालमा १२८ जनाको डीएनए संकलन गरिएको छ। तीमध्ये ९१ पुरुष, ३४ महिला, दुई बालक र एक बालिका छन्।

विपद्मा उद्धार गरिएका नेपाली नागरिकको संख्या १ हजार ३७२ र विदेशीको संख्या ८९ गरी कुल १ हजार ४६१ पुगेको छ। उद्धार भएकामध्ये नेपाली ८६४ पुरुष, ५०७ महिला र एक जनाको लिंग नखुलेको विवरणमा उल्लेख छ। विदेशीमध्ये ६४ पुरुष, २४ महिला र एक जनाको विवरण खुलेको छैन।

तर सम्पर्कविहीन तथा बेपत्ताको संख्या अझै ठूलो छ। विवरणअनुसार नेपाली प्रहरी २५, नेपाली सेना २७, सशस्त्र प्रहरी १२, गोसाइँकुण्ड गाउँपालिकाका कर्मचारी ३३, उत्तरगया गाउँपालिकाका कर्मचारी १३, अध्यागमन कार्यालयका कर्मचारी तीन तथा विभिन्न सरकारी कार्यालय र बैंक तथा वित्तीय संस्थाका कर्मचारीसमेत गरी ३ हजार ९०६ जना सम्पर्कविहीन छन्। यसमा रसुवाका १ हजार ६४४ नागरिक, अन्य जिल्लाका १ हजार ८२३ नागरिक र २७७ विदेशी पर्यटकसमेत छन्।

बाढीबाट सरकारी तथा सार्वजनिक निकायका ३१ संरचना, आठ जलविद्युत् आयोजना, चार विद्यालय, १५ बैंक तथा वित्तीय संस्था, एउटा पेट्रोल पम्प र २९ वटा पुलमा क्षति पुगेको छ। यस्तै करिब १ हजार ५०० निजी घरमा क्षति पुगेको र ४१ किलोमिटर सडक प्रभावित भएको विवरणमा उल्लेख छ।

रसुवाका विभिन्न स्थानमा रहेका होल्डिङ सेल्टरमा २०२ जना रहेको केन्द्रले जनाएको छ। बाढीबाट गोसाइँकुण्ड, आमाछोदिङ्गो, कालिका र उत्तरगया गाउँपालिकाका विभिन्न क्षेत्र पूर्ण तथा आंशिक रूपमा प्रभावित भएका छन्।

बाढीपछि बाह्र घुम्तीबाट रसुवागढीसम्मको पासाङल्हामु राजमार्ग तथा त्रिशूली–बेत्रावती–खाल्टे–मैलुङ–स्याफ्रुबेंसी–टिमुरे–रसुवागढी सडक पूर्ण रूपमा अवरुद्ध रहेको विवरणमा उल्लेख छ। वैकल्पिक राजमार्गका केही खण्ड भने सञ्चालनमा आएका छन्।

जिल्ला आपतकालीन कार्य सञ्चालन केन्द्रका अनुसार भदौ १३ देखि असोज ५ गतेसम्म बाढी प्रभावित क्षेत्रमा २७० पटक राहत वितरण तथा पठाइएको छ। आमाछोदिङ्गो गाउँपालिका–१ का हाकु, नेसिङ, ग्रे र हाकुबेंसीमा ड्रोनमार्फत ६३ पटक राहत सामग्री पुर्‍याइएको छ।

प्रकाशित मिति:
प्रतिक्रिया दिनुहोस्
The Reporter
Current Affairs
Sidhakura Investigation
थप समाज