बाढी–पहिरोले बागमतीका यी सडक अझै प्रभावित, रसुवाका सबै मुख्य राजमार्ग अवरुद्ध

काठमाडौं । बाढी, पहिरो र सम्भावित बाढीका कारण बागमती प्रदेशका विभिन्न राजमार्ग तथा सडकखण्डमा यातायात प्रभावित भएको छ। असोज ७ गते बिहान ६ बजेसम्मको विवरणअनुसार रसुवाका सबै मुख्य राजमार्ग पूर्ण रूपमा अवरुद्ध छन्।

Watch On

रसुवामा भदौ १० गते बिहान १०ः३० बजेदेखि बाढीका कारण मुख्य राजमार्ग सबै अवरुद्ध छन्। ती सडक कहिले खुल्ने भन्नेबारे अर्को सूचना जारी नभएसम्मका लागि अवरोध कायम रहेको छ।

काभ्रेमा बीपी राजमार्गअन्तर्गत खुर्कोट–नेपालथोक–कटुन्जेबेंसी चल्ने सम्पूर्ण सवारीसाधन प्रभावित छन्। भदौ १६ गतेदेखि सम्भावित बाढीका कारण उक्त सडकखण्डमा आवागमन प्रभावित भएको हो। विवरणअनुसार बेलुका ७ बजेदेखि बिहान ५ बजेसम्म १० टनसम्मका मालवाहक सवारीसाधन सञ्चालन गर्न सकिने व्यवस्था छ। बिहान ४ बजेदेखि साँझ ६ बजेसम्म भने परिस्थितिको विचार गरी सवारीसाधन सञ्चालन हुने उल्लेख छ।

नुवाकोटको शिवपुरी गाउँपालिका–८ घट्टेखोलामा टोखा–छहरे सडकखण्डमा रातको समयमा सवारीसाधन सञ्चालनमा रोक लगाइएको छ। भदौ १ गते राति १० बजेदेखि बिहान ५ बजेसम्म अर्को सूचना नभएसम्मका लागि सम्भावित बाढी तथा पहिरोको जोखिमका कारण यस्तो रोक लगाइएको हो।

त्यस्तै, भदौ १० गते बिहान १०ः३० बजेदेखि बाढीका कारण विदुर नगरपालिका–१० सिमटारस्थित पासाङ ल्हामु सडकखण्ड पूर्ण रूपमा अवरुद्ध छ।

धादिङमा भने पृथ्वीलोकमार्गका दुई स्थानमा पहिरोका कारण सडक प्रभावित भए पनि एकतर्फी यातायात सञ्चालनमा छ। बेनीघाट रोराङ गाउँपालिका–१० ज्वाडखोलामा भदौ १६ गते साँझ ६ बजेदेखि र बेनीघाट रोराङ गाउँपालिकाको शीतलबजारमा भदौ २६ गते दिउँसो २ बजेदेखि पहिरोका कारण सडक प्रभावित भएको हो। दुवै स्थानमा एकतर्फी यातायात सञ्चालनमा रहेको तालिकामा उल्लेख छ।

असोज ७ गते बिहान ६ बजेसम्मको अवस्थाअनुसार बागमती प्रदेशमा सडकको अवस्था:

काभ्रे: बीपी राजमार्गमा समय र सवारीको प्रकारअनुसार सञ्चालन

रसुवा: मुख्य राजमार्ग सबै पूर्ण अवरुद्ध

नुवाकोट: टोखा–छहरे सडकमा राति आवागमन रोक; पासाङ ल्हामु सडकखण्ड पूर्ण अवरुद्ध

धादिङ: पृथ्वीलोकमार्गका दुई स्थानमा एकतर्फी यातायात सञ्चालन