गोकर्ण विष्टले केन्द्रीय कमिटी बैठकमा उठाए ६ प्रश्न

काठमाडौं । नेकपा एमालेका उपाध्यक्ष गोकर्ण विष्टले निर्वाचनमा पराजय व्यहोरेको आठ महिनापछि प्रतिनिधि सभा पुनर्स्थापनाका लागि आन्दोलन गर्ने विषय अध्यक्ष केपी शर्मा ओलीको राजनीतिक प्रतिवेदनमा राख्नु अनुचित भएको बताएका छन्।

Watch On

एमाले केन्द्रीय कमिटी बैठकमा धारणा राख्दै विष्टले निर्वाचनमा सहभागी भएर पराजित भइसकेपछि प्रतिनिधि सभा पुनर्स्थापनाको आन्दोलनमा जाने कुरा राजनीतिक नैतिकता, औचित्य र सान्दर्भिकताका हिसाबले गलत हुने बताएका हुन्। उनले प्रतिवेदनमा रहेको त्यससम्बन्धी वाक्यांश फिर्ता लिनुपर्ने माग गरेका छन्।

‘निर्वाचनमा भाग नलिएको भए पुनर्स्थापनाको कुरा उठाउनु वा आन्दोलनको कुरा गर्नु जायज पनि हुन सक्थ्यो। तर निर्वाचनमा भाग लिएर पराजयको आठ महिनापछि प्रतिनिधि सभा पुनर्स्थापनाको लागि आन्दोलन गर्छौँ भन्ने आशयले प्रतिवेदनमा आउने कुरा राजनीतिक नैतिकता, औचित्य र सान्दर्भिकताको हिसाबले अनुचित छ,’ विष्टले भने।

उनले यस्तो लेखन पार्टीका लागि ‘आत्मघाती र विनाशकारी’ हुन सक्ने भन्दै त्यसलाई फिर्ता लिनुपर्ने बताएका छन्।

विष्टले अध्यक्षकै सिफारिस र रोजाइमा गठन गरिएको निर्वाचन समीक्षा तथा पार्टी पुनर्गठन कार्यदलको सर्वसम्मत प्रतिवेदन केन्द्रीय कमिटीमा प्रस्तुत नगरिएको विषयमा पनि प्रश्न उठाएका छन्। उनका अनुसार कार्यदलले तयार पारेको प्रतिवेदन केन्द्रीय कमिटीमा ल्याएर छलफल गर्नुपर्ने थियो।

‘यो कार्यदलले ल्याएको सर्वसम्मत प्रतिवेदनलाई कमिटीमा प्रस्तुत नगर्ने कुरा यो सम्मानित केन्द्रीय कमिटीप्रतिको अवमूल्यन हो। अपमान पनि हो,’ उनले भने।

विष्टले एमालेको पछिल्लो चुनावी अवस्थालाई हेरेर पार्टीभित्र गम्भीर समीक्षा आवश्यक रहेको बताएका छन्। उनले २०७४ को निर्वाचनमा एमालेले ३३ प्रतिशत, २०७९ मा २७ प्रतिशत र २०८२ मा १३ प्रतिशत मत प्राप्त गरेको तथ्य प्रस्तुत गर्दै पार्टीको जनमत निरन्तर घटेको बताएका छन्।

उनले २०७४ मा संसदभित्र पहिलो पार्टी रहेको एमाले २०७९ मा दोस्रो र २०८२ मा चौथो पार्टीका रूपमा स्थापित भएको भन्दै संगठनको वर्तमान अवस्थाप्रति प्रश्न उठाए।

‘सदस्यता नवीकरण हुन सकिरहेको छैन, कमिटीको बहुमत पुग्दैन। पार्टी जनताको बीचमा जान सकिरहेको छैन,’ विष्टले भने, ‘हामीले सरकारको पटक-पटक नेतृत्व गरेकै अवधिमा यो प्रकारले पार्टी ओरालो लाग्दा पनि ‘सब ठीकठाक छ’ भन्ने कुराले के भविष्यमा पार्टीले परिणाम ल्याउला?’

उनले उही शैली, तरिका, सोच, चिन्तन र प्रवृत्तिबाट पार्टीले अहिलेका चुनौती र आवश्यकतालाई सम्बोधन गर्न नसक्ने बताए। यथास्थितिमा पार्टी अगाडि बढ्न नसक्ने भन्दै उनले केन्द्रीय कमिटीले यस विषयमा गम्भीरतापूर्वक सोच्नुपर्ने बताए।

विष्टले पार्टीभित्रका अन्तरविरोध समाधानका लागि विधि, मापदण्ड र औचित्य कमजोर हुँदै गएको पनि बताए।

उनका अनुसार विचार, नीति, कार्यक्रम, कार्यशैली, पदीय प्रतिस्पर्धा र अवसरको बाँडफाँटजस्ता विषयले कुनै पनि जीवन्त पार्टीमा अन्तरविरोध जन्माउन सक्छन्। तर त्यस्ता अन्तरविरोधको समाधान संवाद, विवेक, विधि र मापदण्डका आधारमा खोजिनुपर्ने उनको भनाइ छ।

‘संख्याले वैधता प्राप्त गर्न सक्ला, शक्ति पनि अर्जन गर्न सक्ला। तर संख्याले सबै समाधान दिन सक्दैन वा संख्याले विवेक नदिन पनि सक्छ,’ विष्टले भने।

पार्टीभित्र मापदण्ड, औचित्य, विवेक र विधिका आधारमा समाधान खोज्ने अभ्यास कमजोर भएको भन्दै उनले त्यसमा सुधार नभएसम्म पार्टीलाई पुनः जागृत गरेर अगाडि बढाउन कठिन हुने बताए।

विष्टले एमालेभित्र सामूहिकता करिब–करिब समाप्त भएको र शक्तिको केन्द्रीकरणबाट पार्टी सञ्चालन गर्ने प्रवृत्ति देखिएको आरोप पनि लगाए।

‘व्यक्तिगत जिम्मेवारी, सामूहिक नेतृत्व प्रणाली नै समाप्त भएको सन्दर्भमा पार्टीले सामूहिक भावनाका साथ अगाडि बढ्न सकेन भने आउँदा दिनहरु पार्टीका लागि चुनौतीपूर्ण हुन्छन्,’ उनले भने, ‘अथवा पार्टी अझ ओरालो लाग्न सक्दछ।’

पार्टीको भविष्यका लागि कमजोरीहरूलाई खुला रूपमा समीक्षा गरेर दृढताका साथ सच्याउनुपर्ने उनको भनाइ थियो।

‘पार्टीभित्र देखापरेका कमीहरुलाई हामीले खुला ढंगले समीक्षा गर्ने, दृढताका साथ त्यसलाई सच्याउने र नयाँ ढंगले अगाडि जाने संकल्प हामीले व्यक्त गर्नुपर्दछ,’ विष्टले भने।

उनले केन्द्रीय कमिटीले उठाइएका प्रश्नलाई गम्भीरताका साथ सम्बोधन नगरे परिस्थिति सोचेभन्दा फरक हुन सक्ने चेतावनी पनि दिएका छन्।

‘परिस्थितिलाई सकारात्मक मोडमा ल्याउनका लागि हामीले गम्भीरताका साथ यी प्रश्नहरुको समाधान खोज्न आवश्यक छ,’ उनले भने।

एमालेको केन्द्रीय कमिटी बैठकमा विष्टसहित विभिन्न पदाधिकारी तथा केन्द्रीय सदस्यहरूले अध्यक्ष ओलीको राजनीतिक प्रतिवेदनमाथि धारणा राखेका थिए। बैठकले भने ओलीको राजनीतिक प्रतिवेदन सर्वसम्मतिले पारित गरिसकेको छ।