सम्भावित विपद्‌बाट जोगिन रास्वपाले जारी गर्‍यो पाँच बुँदे अपिल

काठमाडौँ । राष्ट्रिय स्वतन्त्र पार्टीले सम्भावित विपदबाट जोगिन पाँच बुँदे अपिल जारी गरेको छ । 

Watch On

रास्वपा सचेतक प्रकाशचन्द्र परियारले बिहीबार विहान  मनसुनी विपद्‌बाट जोगिन सतर्कता अपनाउन सार्वजनिक अपिल जारी गरेका हुन् । 

परियारकाअनुसार ​हाल देशैभर मनसुनी वायुको तीव्र प्रभावका कारण विभिन्न भू-भागमा भारी तथा भारीभन्दा बढी वर्षा भइरहेको र आगामी केही दिनसम्म अझै ठूलो पानी पर्ने मौसम पूर्वानुमान महाशाखाको प्रक्षेपण रहेको छ । निरन्तरको वर्षाका कारण नदी तथा खोलाहरूमा जलसतह बढ्दो क्रममा छ भने पहाडी क्षेत्रहरूमा पहिरो, भू-क्षय र भू-स्खलनको जोखिम उच्च बनेको छ । तराई तथा सहरी क्षेत्रहरूमा डुबान र जलमग्न हुने समस्याले जनजीवन प्रभावित बन्न पुगेको छ ।

'​यस्तो अवस्थामा हुनसक्ने सम्भावित जनधनको क्षतिलाई न्यूनीकरण गर्न, जनस्वास्थ्यको रक्षा गर्न र आफ्ना आफन्त तथा छिमेकीहरूको सुरक्षा सुनिश्चित गर्नका लागि राष्ट्रिय स्वतन्त्र पार्टी संसदीय दलको तर्फबाट म सम्पूर्ण नागरिक, स्थानीय समुदाय, युवा स्वयंसेवक तथा सरोकारवाला निकायहरूमा उच्च सतर्कता अपनाउन हार्दिक अपिल गर्दछु,' उनले भनेका छन् । 

सचेतक परियारले ​विपद्‌को यस कठिन घडीमा नेपाल सरकार, गृहमन्त्रालय, सुरक्षा निकायहरू (नेपाली सेना, नेपाल प्रहरी, सशस्त्र प्रहरी बल), स्थानीय तह र स्वयंसेवी संस्थाहरूलाई द्रुत उद्धार, राहत तथा पुनर्स्थापनाका लागि चौबीसै घण्टा तयारी अवस्थामा रहन जोडदार माग गरेका छन् । साथै, राष्ट्रिय स्वतन्त्र पार्टीका सम्पूर्ण नेता, कार्यकर्ता तथा युवाहरूलाई पनि आ-आफ्नो क्षेत्रमा उद्धार र राहत कार्यमा अग्रसर भई विपद् व्यवस्थापनमा खटिन अपिल गरेका छन् । 

'​हाम्रो अलिकति सजगता र पूर्वतयारीले ठूलो जनधनको क्षति हुनबाट जोगाउन सकिन्छ। त्यसैले संयमित बनौँ, सतर्क रहौँ र एक-अर्कालाई सहयोग गरौँ,' उनले भनेका छन् । 

परियारले जारी गरेको पाँच बुँदे अपिल:

​१. जोखिमयुक्त क्षेत्रबाट सुरक्षित स्थानमा सरौँ:
नदी, खोला, किनारका बस्ती, पहिरोको उच्च जोखिममा रहेका भिरालो जमिन तथा होचा डुबान क्षेत्रमा बसोबास गर्नुहुने नागरिकहरूले पूर्वतयारीका साथ बेलैमा सुरक्षित स्थानमा स्थानान्तरण हुनुहोस् । 

​२. अत्यावश्यक बाहेक यात्रा नगराऔँ:
बाढी, पहिरो र सडक हिलो तथा अवरुद्ध हुने सम्भावना अत्यधिक रहेकाले मनसुन सक्रिय रहेको यो अवधिभर अत्यावश्यक काम बाहेक लामो दूरीको यात्रा वा जोखिमयुक्त सडकमा यात्रा नगर्नुहोला।

​३. मौसम तथा विपद्‌ सम्बन्धी सूचनाको नियमित पालना गरौँ:
सरकारी निकाय, मौसम पूर्वानुमान महाशाखा र स्थानीय प्रशासनले जारी गर्ने आधिकारिक सूचना, जलसतहको अपडेट र चेतावनीहरूलाई नियमित रूपमा पछ्याऔँ।

​४. आपत्कालीन सामाग्री तथा सम्पर्क नम्बरहरू तयार राखौँ:
सुक्खा खाना, पिउने पानी, प्राथमिक उपचारका औषधि, टर्चलाइट र महत्त्वपूर्ण कागजातहरू सजिलै भेटिने गरी आपत्कालीन झोलामा राखौँ। स्थानीय सुरक्षा निकाय, उद्धार टोली, एम्बुलेन्स र पालिकाका आपत्कालीन नम्बरहरू सुरक्षित राखौँ।

​५. समुदायस्तरमा पूर्वसूचना र सहयोग आदानप्रदान गरौँ:
आफ्नो टोल-छिमेकमा वृद्धवृद्धा, बालबालिका, गर्भवती र अपाङ्गता भएका व्यक्तिहरूको विशेष ध्यान दिऊँ। कुनै पनि स्थानमा जोखिम वा दुर्घटनाको सङ्केत देखिएमा तुरुन्तै स्थानीय प्रशासन र सुरक्षा निकायलाई खबर गरौँ।