भारी वर्षापछि कर्णालीका प्रमुख राजमार्ग अवरुद्ध

कर्णाली । असोज ८ गते बेलुकादेखि १० गते बिहानसम्म परेको अविरल वर्षापछि कर्णाली प्रदेशका प्रमुख राजमार्ग तथा सडकखण्ड पहिरोका कारण अवरुद्ध भएका छन्।

Watch On

कर्णाली प्रदेश प्रहरी कार्यालय सुर्खेतका प्रवक्ता एवं प्रहरी वरिष्ठ उपरीक्षक सन्तोषसिंह राठौरका अनुसार कर्णाली करिडोर र कर्णाली राजमार्गका विभिन्न स्थानमा पहिरो खसेपछि यातायात अवरुद्ध भएको हो।

वर्षाका कारण सुर्खेत–दैलेख–कालीकोट–बाजुरा हुँदै हुम्ला जोड्ने कर्णाली करिडोरअन्तर्गत हुम्लाको सर्केगाड गाउँपालिका–१ खच्चा, कालीकोटको शुभकालिका गाउँपालिका–१ गगने खोला र एस मोड तथा सुर्खेतको बराहताल गाउँपालिका–७ औलिसेमा पहिरो गएको छ।

त्यस्तै, सुर्खेत–दैलेख–कालीकोट हुँदै जुम्ला तथा मुगु जोड्ने कर्णाली राजमार्ग पनि विभिन्न स्थानमा अवरुद्ध भएको छ।

रुकुमपश्चिमको सानीभेरी गाउँपालिका–२ सम्लेखोलामा पहिरो खसेपछि मध्यपहाडी राजमार्ग अवरुद्ध भएको छ। सल्यानको कपुरकोट गाउँपालिका–५ खारखोलामा पहिरो जाँदा राप्ती राजमार्ग पनि बन्द भएको छ।

सल्यानकै बनगाड कुपिण्डे नगरपालिका–८ र्यालेमा पहिरो खसेपछि सुर्खेत–सल्यान सडक तथा त्रिवेणी गाउँपालिका–३ ढुङ्गेबगरमा पहिरो गएपछि लुहाम–कालीमाटी सडकखण्ड अवरुद्ध भएको प्रहरीले जनाएको छ।

यस्तै, जाजरकोटको छेडागाड नगरपालिका–४ लेवाभिर, कालीकोटको तिलागुफा नगरपालिका–१ भिग्म, जुम्लाको तातोपानी गाउँपालिका–१ बाइराँका र राँकागाउँबीचको सडकखण्ड तथा मुगुको छायानाथ रारा नगरपालिका–७ र ८ पिनास्थित गमगढी–नाग्म सडकखण्ड पनि पहिरोका कारण बन्द भएका छन्।

सडक सञ्चालनमा ल्याउन सडक डिभिजन कार्यालय जुम्ला, जाजरकोट, सल्यान र सुर्खेतबाट जेसिबी तथा स्काभेटरलगायत उपकरण परिचालन गरिएको प्रवक्ता राठौरले बताए।

उनका अनुसार अवरुद्ध सडकमा पहिरो पन्छाउने काम भइरहेको छ।