चार दिनमा डेढगाउँमा ५४४ मिलिमिटर वर्षा, १० स्टेशनमा ३६५ मिलिमिटरभन्दा बढी

काठमाडौं । पछिल्ला चार दिनमा देशका विभिन्न स्थानमा अत्यधिक वर्षा भएको छ। जल तथा मौसम विज्ञान विभागको तथ्याङ्कअनुसार सेप्टेम्बर २३ बिहान ८ः४५ बजेदेखि सेप्टेम्बर २७ बिहान ८ः४५ बजेसम्म नवलपरासी (बर्दघाट सुस्ता पूर्व) को डेढगाउँमा ५४४.२ मिलिमिटर वर्षा भएको छ।

Watch On

विभागका अनुसार उक्त चारदिने अवधिमा सबैभन्दा धेरै वर्षा भएका १० वटा वर्षा मापन केन्द्रमध्ये सबैमा ३६५ मिलिमिटरभन्दा बढी वर्षा रेकर्ड भएको छ।

डेढगाउँपछि कास्कीको पञ्चासेमा ५००.२ मिलिमिटर वर्षा भएको छ। त्यस्तै तनहुँको अत्रौलीटारमा ४७२, पाल्पाको तानसेनमा ४५८ र स्याङ्जाको पञ्चमूलमा ४३१.८ मिलिमिटर वर्षा भएको विभागको तथ्याङ्क छ।

म्याग्दीको दरबाङमा ३९७.४, चितवनको माडी कल्याणपुरमा ३९६, कपिलवस्तुको मैनारमा ३८८.६, कपिलवस्तुकै भगवानपुरमा ३६६.६ तथा नवलपरासी (बर्दघाट सुस्ता पूर्व)को देउराली नवलपुरमा ३६५.६ मिलिमिटर वर्षा मापन भएको छ।

विभागको विवरणअनुसार पछिल्ला चार दिनमा विशेषगरी गण्डकी, लुम्बिनी र आसपासका क्षेत्रमा उल्लेख्य वर्षा भएको देखिन्छ। लगातारको वर्षाका कारण ती क्षेत्रका नदी तथा खोलामा जलसतह बढ्नुका साथै पहिरो र बाढीको जोखिमसमेत बढेको छ।

वर्षा केही कम हुँदै गए पनि भौगोलिक अवस्थाका कारण पहिरो, नदीमा आकस्मिक बाढी तथा सडक अवरोधको जोखिम कायमै रहने भएकाले प्रभावित तथा जोखिमयुक्त क्षेत्रमा सतर्कता अपनाउन आवश्यक रहेको विभागले जनाएको छ।